រដ្ឋបាលខេត្តស្វាយរៀង បើកកិច្ចប្រជុំស្តីពីតួនាទី និងភារកិច្ចរបស់គណៈកម្មាធិការជាតិ ប្រឆាំងទារុណកម្ម និងបទដ្ឋានអន្តរជាតិ ពាក់ព័ន្ធនឹងការប្រឆាំងទារុណកម្ម
ខេត្តសៀមរាប៖នាព្រឹកថ្ងៃព្រហស្បតិ៍ ៤កើត ខែកត្ដិក ឆ្នាំកុរ ឯកស័ក ព.ស .២៥៦៣ ត្រូវនឹងថ្ងៃទី៣១ ខែតុលា ឆ្នាំ២០១៩ ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្ម ឯកឧត្ដម សេង សីលា អភិបាលរងខេត្ត តំណាងឯកឧត្តមអភិបាលខេត្ត និងឯកឧត្ដម ហ៊ូ វតនៈ សមាជិកក្រុមប្រឹក្សាខេត្ត បានអញ្ជើញជាអធិបតីក្នុងវគ្គអប់រំផ្សព្វផ្សាយស្តីពីតួនាទី និងភារកិច្ចរបស់គណៈកម្មាធិការជាតិប្រឆាំងទារុណកម្ម និងបទដ្ឋានអន្តរជាតិពាក់ព័ន្ធនឹងការប្រឆាំងទារុណកម្ម នៅសាលប្រជុំធំ អគារ ឃ សាលាខេត្ត។
ពិធីនេះមានការអញ្ជើញចូលរួមពីប្រតិភូគណៈកម្មាធិការជាតិប្រឆាំងទារុណកម្ម លោកស្នងការរងនគរបាលខេត្ត លោកបញ្ជាការរងកងរាជអាវុធហត្ថខេត្ត អធិការ អធិការរងនគរបាល និងមេបញ្ជាការ មេបញ្ជាការរងមូលដ្ឋានកងរាជអាវុធហត្ថក្រុង ស្រុក ពន្ធនាគារខេត្ត តំណាងអយ្យការ តំណាងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត មន្ទីរកិច្ចការនារីខេត្ត មន្ទីរសុខាភិបាលខេត្ត តំណាងអង្គការក្រៅរដ្ឋាភិបាលពាក់ព័ន្ធនឹងការងារសិទ្ធិមនុស្ស និងមន្រ្តីលេខាធិការដ្ឋាន គ.ជ.ប.ទ សរុបចំនួន១២០រូប។
ក្នុងឱកាសនោះ ឯកឧត្ដមអភិបាលរងខេត្ត ក្នុងនាមតំណាងឯកឧត្តមអភិបាលខេត្ត បានមានមតិស្វាគមន៍ និងរាយការណ៍សង្ខេបពីស្ថានភាពរបស់រដ្ឋបាលខេត្ត និងបានផ្តាំផ្ញើសមាជិក សមាជិកានៃវគ្គផ្សព្វផ្សាយយកចិត្តទុកដាក់ស្តាប់ កត់ត្រាប្រសាសន៍បើកវគ្គ្គផ្សព្វផ្សាយរបស់ឯកឧត្តមប្រធាន និងគ្រូឧទ្ទេស។
សូមបញ្ជាក់ថា វគ្គអប់រំផ្សព្វផ្សាយនេះ ផ្តោតជាសំខាន់លើប្រធានបទចំនួន៣គឺ៖
១.យន្តការថ្នាក់ជាតិ និងអន្តរជាតិ បង្ការអំពើទារុណកម្ម
២.បទដ្ឋានអន្តរជាតិ ទាក់ទងនិងជនដែលត្រូវបានដកហូតសេរីភាព
៣.តួនាទី និងភារកិច្ចរបស់គណៈកម្មាធិការជាតិប្រឆាំងទារុណកម្ម (គ.ជ.ប.ទ) ៕
