លោកជំទាវកិត្តិសង្គហបណ្ឌិត ម៉ែន សំអន អញ្ជើញសម្ពោធសណ្ឋាគារ និងកាស៊ីណូ ហ្គដដេស អហ្វលីបីទី (Goddess of Liberty Hotel & Casino) ក្រុង ខេត្ដព្រះសីហនុ
ខេត្តព្រះសីហនុ៖នៅព្រឹកថ្ងៃទី៣០ ខែតុលា ឆ្នាំ២០១៩ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្ដី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញសម្ពោធសណ្ឋាគារ និងកាស៊ីណូ ហ្គដដេស អហ្វលីបីទី (Goddess of Liberty Hotel & Casino) ក្រុង ខេត្ដព្រះសីហនុ។
ក្នុងពិធីនោះក៏មានការអញ្ជើញចូលរួមពី ឯកឧត្តម ជាម ហ៊ីម ប្រធានក្រុមប្រឹក្សាខេត្ត ឯកឧត្ដម គួច ចំរើន អភិបាល នៃគណៈអភិបាលខេត្ដព្រះសីហនុ និងលោក លីវ តាវួយ (Michael Liv) អគ្គនាយកក្រុមហ៊ុនសណ្ឋាគារ និងកាស៊ីណូ ហ្គដ ដេស អហ្វលីបីទី និងភ្ញៀវកិត្ដិយស។
ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានអបអរសាទរពិធីសម្ពោធដំណើរការសណ្ឋាគារ និងកាស៊ីណូ ហ្គដ ដេស អហ្វលីបីទី ជាការរួមចំណែកលើក កម្ពស់សេដ្ឋកិច្ចខេត្តព្រះសីហនុ ព្រមទាំងផ្តល់ការងារដល់ប្រជាពលរដ្ឋ កាត់បន្ថយភាពក្រីក្រស្របតាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ ដើម្បីកំណើនសេដ្ឋកិច្ច ការងារ សមធម៌ និងប្រសិទ្ធភាពនៅកម្ពុជា។
រាជរដ្ឋាភិបាលកំណត់ខេត្តព្រះសីហនុ ជាប៉ូលអភិវឌ្ឍន៍ទីក្រុងទំនើប រមណីយដ្ឋាន ឆ្នេរសមុទ្រស្អាតបំផុតលើសកលលោក ជាតំបន់សេដ្ឋកិច្ចពិសេសគំរូពហុបំណង ជាច្រកចេញចូលអន្តរជាតិ មជ្ឈមណ្ឌលកំណើតជាតិ មជ្ឈមណ្ឌលភស្តុភារធម្មជាតិ មានទំនាក់ទំនងជាមួយទីផ្សារអាស៊ាន និងទីផ្សារសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើប ដែលមានសុខដុមនីយកម្មជាមួយនឹងបរិស្ថានរស់នៅល្អប្រសើរ។
រយៈពេលប៉ុន្មានឆ្នាំចុងក្រោយនេះខេត្តព្រះស៊ីហនុទទួលបាននូវការចាប់អារម្មណ៍ បណ្ដាក់ទុនយ៉ាងច្រើនសន្ធឹកសន្ធាប់ ពីអ្នកវិនិយោគបរទេស ជាពិសេសអ្នកវិនិយោគជនជាតិចិនស្ថិតក្នុងលំដាប់ទី១ ជាហេតុធ្វើឱ្យខេត្តព្រះសីហនុ មានសន្ទុះអភិវឌ្ឍរីកចម្រើនយ៉ាងឆាប់រហ័សលើវិស័យសំខាន់ៗដូចជា ឧស្សាហកម្ម ពាណិជ្ជកម្ម ដឹកជញ្ជូន សំណង់ ទេសចរណ៍ និងកាស៊ីណូ ដើម្បីក្រុងព្រះសីហនុ ប្រែក្លាយជាទីក្រុងទំនើប មានសោភ័ណភាព បរិស្ថានល្អ សម្រាប់ការរស់នៅ ទេសចរណ៍ និងធុរកិច្ច។
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្ដី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច មានប្រសាសន៍សម្ពោធប្រើប្រាស់សណ្ឋាគារ និងកាស៊ីណូ ហ្គដដេស អហ្វលីបីទី (Goddess of Liberty Hotel & Casino) ថាសណ្ឋាគារ និងកាស៊ីណូដ៏ល្អប្រណិតថ្មី បំពាក់ដោយគ្រឿងសង្ហារឹម និងឧបករណ៍ទំនើបៗនេះពិតជាសមិទ្ធផលថ្មីមួយទៀត របស់ខេត្តព្រះសីហនុ ដែលជាខេត្ដភាគនីរតី នៃប្រទេសកម្ពុជា មានសក្តានុពលយ៉ាងខ្លាំងផ្នែកពាណិជ្ជកម្ម ឧស្សាហកម្ម ទេសចរណ៍ ឆ្លុះបញ្ចាំងនូវការលូតលាស់ឥតឈប់ឈរ នៃការវិនិយោគបរទេស និងវិស័យឯកជននៅកម្ពុជា ដូចជាការទាក់ទាញអ្នកវិនិយោគមកពីប្រទេសចិន។
យុទ្ធសាស្រ្ដចតុកោណដំណាក់កាលទី៤ អាណត្តិទី៦ ដើម្បីកំណើនការងារ សមធម៌ និងប្រសិទ្ធភាពនៅកម្ពុជា វិស័យឯកជនជាក្បាលម៉ាស៊ីន នៃការអភិវឌ្ឍបង្កលក្ខណៈងាយស្រួល និងជម្រុញវិស័យឯកជនឲ្យលូតលាស់ ដើម្បីរួមចំណែកអភិវឌ្ឍសេដ្ឋកិច្ច-សង្គម។
លោកជំទាវកិត្តិសង្គហបណ្ឌិត បន្តថា អាជីវកម្មសណ្ឋាគារ ខុនដូ សំណង់ខ្ពស់ៗជាច្រើនបានបំរើឱ្យវិស័យទេសចរក្នុងការស្នាក់នៅ និងកម្សាន្ត បានផ្តល់ការងារជាច្រើនដល់ប្រជាជនកម្ពុជា រួមចំណែកអភិវឌ្ឍន៍ និងកាត់បន្ថយភាពក្រីក្រក្នុងខេត្តព្រះសីហនុ ក្រោមការដឹកនាំប្រកបដោយកត្ដិបណ្ឌិត និងភាពភ្លឺស្វាង វាងវៃរបស់រាជរដ្ឋាភិបាល ដែលមានសម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះ រាជាណាចក្រកម្ពុជា ធ្វើឱ្យមានស្ថិរភាពនយោបាយ សន្ដិសុខ និងសន្តិភាព ធានាបានសន្ដិសុខ និងការអភិវឌ្ឍន៍លើគ្រប់វិស័យ៕