រថយន្តដឹកកម្មករបែកកង់មុខក្រឡាប់ បណ្តាលឲ្យមនុស្សចំនួន២៤នាក់ រងរបួសធ្ងន់ ស្រាលធ្ងន់ស្រាល នៅស្រុកជុំគិរី
ខេត្តកំពត៖រថយន្តម៉ាកសាមយ៉ុងមួយគ្រឿង ដែលដឹកកម្មករ បានបែកកង់មុខផ្នែកខាងស្តាំ បានក្រឡាប់បណ្តាលឲ្យកម្មករដែលជិះលើរថយន្តចំនួន២៤នាក់រងរបួសធ្ងន់ស្រាល។ប៉ុន្តែហេតុការណ៍នេះពុំមានកម្មករណាម្នាក់ស្លាប់បាត់បង់ជីវិតនោះឡើយ។
ហេតុការណ៍នេះបានកើតឡើងនៅវេលាម៉ោង៦និង១៥នាទីព្រឹក ថ្ងៃទី០២ ខែតុលា ឆ្នាំ២០១៩ ត្រង់ចំណុចឃុំស្រែចែង ស្រុកជុំគិរី ខេត្តកំពត ចន្លោះ គ.ម លេខ (៦១-៦២) នៃកំណាត់ផ្លូវជាតិលេខ៤១។
ទាក់ទិននឹងករណីគ្រោះថ្នាក់បណ្តាលឲ្យកម្មកររងរបួសធ្ងន់ស្រាលខាងលើ លោកវរសេនីយ៍ឯក ម៉ី សុខុម អធិការនគរបាលស្រុកជុំគិរី បានប្រាប់ឲ្យដឹងថា ហេតុការណ៍គ្រោះថ្នាក់ចរាចរនេះ ពុំមានអ្នកណារងគ្រោះបាត់បង់ជីវិតនោះទេ គ្រាន់តែធ្វើឲ្យកម្មករចំនួន២៤នាក់រងរបួស ក្នុងនោះស្រ្តីមាន២១នាក់ និងបុរស៣នាក់ ដោយខណៈនេះត្រូវបានសមត្ថកិច្ចដឹកបញ្ជូនទៅសង្គ្រោះភ្លាមៗនៅឯមន្ទីរពេទ្យស្រុកឈូក និងមន្ទីរពេទ្យខេត្តតាកែវ។
លោកអធិការបានបញ្ជាក់ទៀតថា រថយន្តនេះម៉ាកសាមយ៉ុង ពណ៌លឿង ពាក់ស្លាកលេខ ភ្នំពេញ 2AZ-1542 ធ្វើដំណើរក្នុងទិសដៅពីត្បូងទៅជើង(ពីស្រុកជុំគីរី ទៅរោងចក្រ បឹងត្រកួន ក្នុងស្រុកគងពិសី ខេត្តកំពង់ស្ពឺ) ហើយមូលហេតុបណ្តាលឲ្យរថយន្តនេះក្រឡាប់ គឺស្របពេលកំពុងបើកបរ រថយន្តក៏បានបែកកង់មុខផ្នែកខាងស្តាំ ដោយបានផ្អៀងក្រឡាប់ទាំងកំរោល បណ្តាលឲ្យកម្មករដែលជិះក្នុងរថយន្តទាំងប៉ុន្មាន រងរបួសធ្ងន់ ស្រាលតែម្តង។
បច្ចុប្បន្ន កម្មករដែលរងរបួសទាំង២៤នាក់ ត្រូវសមត្ថកិច្ចដឹកទៅសង្គ្រោះព្យាបាលនៅមន្ទីរពេទ្យស្រុកឈូកចំនួន៨នាក់ ចំណែក១៦នាក់ទៀត ត្រូវបានដឹកបន្តទៅសង្គ្រោះព្យាបាលនៅឯមន្ទីរពេទ្យខេត្តតាកែវ៕
