កិច្ចប្រជុំណែនាំពាក់ព័ន្ធការពង្រឹង ការរៀបចំរចនាសម្ព័ន្ធ សម្រាប់ការតាមដាន ត្រួតពិនិត្យរោងចក្រផលិតបេតុង
ខេត្តព្រះសីហនុ៖នាព្រឹកថ្ងៃសៅរ៍ ទី២៦ ខែតុលា ឆ្នាំ២០១៩ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ឯកឧត្ដម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការត្រួតពិនិត្យគុណភាពសំណង់នៅខេត្តព្រះសីហនុ បានអញ្ជើញជាអធិបតីក្នុងពិធីចកិច្ចប្រជុំណែនាំពាក់ព័ន្ធការពង្រឹង ការរៀបចំរចនាសម្ព័ន្ធសម្រាប់ការតាមដានត្រួតពិនិត្យរោងចក្រផលិតបេតុង ក្នុងខេត្តព្រះសីហនុ។
ក្នុងនោះឯកឧត្តមអភិបាលខេត្តមាន បានប្រសាសន៍ថា រដ្ឋបាលខេត្ត គាំទ្រដល់ការចូលរួមរបស់បងប្អូនម្ចាស់រោងចក្រផលិតបេតុងទាំងអស់ ដែលបានដំណើរការវិនិយោគនៅខេត្តព្រះសីហនុ ប៉ុន្តែការវិនិយោគនោះ មិនត្រូវបង្កឱ្យមានហានិភ័យអ្វីកើតឡើងនោះទេ។ជាមួយនោះឯកឧត្ដមអភិបាលខេត្ត ណែនាំឱ្យម្ចាស់រោងចក្រត្រូវបង្កើតមន្ទីរពិសោធន៍ក្នុងរោងចក្រដោយខ្លួនឯង ដើម្បីពង្រឹងការតាមដានត្រួតពិនិត្យគុណភាព និងរចនាសម្ព័ន្ធនៃចង្វាក់ផលិតកម្មបេតុង ក្នុងរោងចក្ររបស់ខ្លួន។ រាល់ដំណើរការសកម្មភាពអាជីវកម្មរោងចក្រទាំងអស់ ត្រូវអនុវត្តឱ្យបានតាមបទដ្ឋានបច្ចេកទេស ការរៀបចំហេដ្ឋារចនាសម្ព័ន្ធច្បាស់លាស់ ដើម្បីធានាអោយមានសុវត្ថិភាព និងគុណភាព៕
