កម្លាំងជំនាញអធិការក្រុងប៉ោយប៉ែត ចាប់ឃាត់ខ្លួនជនសង្ស័យប្រុស ស្រីចំនួន៧នាក់ ពាក់ពន្ឋ័ករណីគ្រឿងញៀន
ខេត្តបន្ទាយមានជ័យ៖ដូចអ្វីដែរលោកអធិការក្រុងប៉ោយប៉ែតធ្លាប់មានប្រសាន៍ មកកាន់អ្នកសារព័ត៌មានថា លោកនឹងធ្វើការបង្ក្រាបរាល់បទល្មើសផ្សេង ពិសេសគ្រឿងញឿនឲ្យដូចភ្លៀងរលឹម។
ជាក់ស្តែងកាលពីវេលាម៉ោង១០ និង១៥នាទី ថ្ងៃអង្គារ ៣កើត ខែអស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០១ ខែតុលា ឆ្នាំ២០១៩ កម្លាំងជំនាញ ដែលដឹកនាំដោយលោកវរៈសេនីយ៍ឯក ធិន ស៊ិនដេត អធិការដ្ឋាននគរបាលក្រុងប៉ោយប៉ែត បានចុះប្រតិបត្តិការបង្ក្រាប និងចាប់ឃាត់ខ្លួនជនសង្ស័យប្រុស ស្រីចំនួន៧នាក់ ជាបន្តបន្ទាប់ដែលជាប់ពាក់ពន្ឋ័ករណីគ្រឿងញៀន។
ការចុះប្រតិបត្តិការបង្ក្រាបនេះបានធ្វើឡើង ក្រោយពីទទួលទូរស័ព្ទ រាយការណ៍ពីម្ចាស់ផ្ទះសំណាក់«ស្រេង ល្អ»ស្ថិតនៅក្នុងអូរជ្រៅ សង្កាត់/ក្រុងប៉ោយប៉ែត ខេត្តបន្ទាយមានជ័យ។
លោកវរៈសេនីយ៍ឯក ធិន ស៊ិនដេត អធិការដ្ឋាននគរបាលក្រុងប៉ោយប៉ែត បានឲ្យដឹងថា៖ការចុះបង្ក្រាបករណីគ្រឿងញៀននេះកម្លាំងជំនាញរបស់លោកបាន សហការណ៍ជាមួយម្ចាស់ផ្ទះសំណាក់ខាងលើ ក៏ធ្វើការត្រួតពិនិត្យនូវបន្ទប់នីមួយៗ រហូតកំណត់បានមុខសញ្ញានៅក្នុងបន្ទប់មួយចំនួនរួមមាន៖
-លេខ២១ បានរកឃើញជនសង្ស័យ១នាក់មានឈ្មោះ ថៃ សុខធី ភេទប្រុស វត្ថុតាងចាប់យកមានថ្នាំប្រភេទម្សៅពណ៌បៃតង១កូនថង់តូច និងម្សៅក្រាមពណ៌សថ្លា១កូនថង់តូច និងសម្ភារៈកែឆ្នៃសម្រាប់ជក់ចំនួន២។
-បន្ទប់លេខ១២ រកឃើញជនសង្ស័យចំនួន៤នាក់ ស្រី១នាក់ និងទុយោកែឆ្នៃសម្រាប់ជក់ចំនួន១។
-បន្ទប់លេខ២២ រកឃើញជនសង្ស័យចំនួន១នាក់ វត្ថុតាងចាប់យកគ្មាន។
លោកបន្តថា៖ដោយផ្អែកតាមការណ៍បំភ្លឺរបស់ឈ្មោះ ថែ សុខធី កម្លាំងបានបន្តទៅឃាត់ខ្លួនជនសង្ស័យម្នាក់ទៀត ឈ្មោះ គឹម សុគន្ធ ភេទប្រុស ជាមួយវត្ថុតាង ថ្នាំប្រភេទម្សៅក្រាមពណ៌សចំនួន១កូនថង់តូច និងថ្នាំប្រភេទគ្រាប់ពណ៌ក្រហម មានអក្សរWY ចំនូន៥គ្រាប់។
បច្ចុប្បន្ន ជនសង្ស័យខាងលើមន្រ្តីផ្នែកជំនាញកំពុងធ្វើការសាកសួរ និងកសាងសំណុំរឿង ដើម្បីចាត់ការបន្តតាមនិតិវិធី៕