មហាសន្និបាតអាណត្តិទី៣ របស់សមាគមក្រុមប្រឹក្សាក្រុង ស្រុក ឃុំ សង្កាត់ខេត្តព្រះវិហារ
ខេត្តព្រះវិហារ៖សមាគមក្រុមប្រឹក្សាក្រុង ស្រុក ឃុំ សង្កាត់ ខេត្តព្រះវិហារ បានរៀបចំពិធីបើកមហាសន្និបាទអាណត្តិទី០៣របស់ខ្លួន នាព្រឹកថ្ងៃព្រហស្បតិ៍០៩រោច ខែអស្សុជ ឆ្នាំកុរ ឯកស័ក ពស២៥៦៣ ត្រូវនឹងថ្ងៃទី២៤ ខែតុលា ឆ្នាំ២០១៩ ក្រោមអធិបតី ភាពលោក ឡុង សុវណ្ណ ប្រធានក្រុមប្រឹក្សាខេត្ត ឯកឧត្តម ស៊ូ សិរី អភិបាលរងខេត្ត លោក គៀង សេងគី អនុប្រធានសម្ព័ន្ធភាពជាតិថ្នាក់មូលដ្ឋាន។
ក្នុងនោះក៏មានការអញ្ជើញចូលរួមពីមេបញ្ជាការកងកម្លាំងទាំងបី ប្រធានមន្ទីរ អង្គភាព អភិបាលក្រុង ស្រុក ក្រុមប្រឹក្សាក្រុង ស្រុកឃុំសង្កាត់ សរុប៣២៥នាក់ នៅសាលប្រជុំសាលាខេត្តព្រះវិហារ។
មានប្រសាសន៍ក្នុងឱកាសនោះលោក ឡុង សុវណ្ណ ប្រធានក្រុមប្រឹក្សាខេត្តបានជម្រាបពីការរៀបចំមហាសន្និបាតនេះឡើងគឺដើម្បីយល់ដឹងអំពីសមិទ្ធផលដែលសមាគមក្រុមប្រឹក្សាក្រុង ស្រុក ឃុំ សង្កាត់ ខេត្តព្រះវិហារ សម្រេចបាន និងលើកទិសដៅបន្តអាណត្តិទី៣។
លោកប្រធានបានបន្តថា លើកឡើងសារសំខាន់របស់សមាគមក្រុមប្រឹក្សាគឺដើម្បីការពារផលប្រយោជន៍រួមរបស់ក្រុមប្រឹក្សាក្រុង ស្រុក ឃុំសង្កាត់ លើកកម្ពស់គុណភាពជីវិតរស់នៅ និងសុខាមាលភាពរបស់ប្រជាពលរដ្ឋតាមរយៈអភិបាលកិច្ចតាមបែបវិជ្ឍការនិងវិសហមជ្ឍការ និងដើម្បីអភិវឌ្ឍសមត្ថភាព និងបង្កើនប្រសិទ្ធភាពនៃការផ្តល់សេវាសាធារណៈដល់ប្រជាពលរដ្ឋមូលដ្ឋាន។
លោកបន្ថែមទៀតថា សមាគមក្រុមប្រឹក្សាក្រុង ស្រុក ឃុំសង្កាត់ គឺដៃគូយ៉ាងសំខាន់ក្នុងការតាក់តែងគោលនយោបាយកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងការកសាងសមត្ថភាពក្រុមប្រឹក្សារដ្ឋបាលថ្នាក់ក្រោមជាតិ ដើម្បីជាស្ថាប័នតំណាងពិតប្រាកដរបស់ប្រជាពលរដ្ឋ និងឆ្លើយតបចំពោះសេចក្តីត្រូវការនានារបស់ប្រជាពលរដ្ឋប្រកបដោយប្រសិទ្ធភាព៕