ស្នងការនគរបាល ខេត្តកំពង់ធំ បង្ហាញមុខមេខ្លោងជួញដូរគ្រឿងញៀនចំនួន៤នាក់ និងថ្នាំញៀនចំនួន៥៣កញ្ចប់
ខេត្តកំពង់ធំ៖បន្ទាប់ពីបង្ក្រាបបានមេខ្លោងជួញដូរគ្រឿងញៀនទ្រង់ទ្រាយធំចំនួន៤នាក់រួមនឹងថ្នាំញៀនយ៉ាងច្រើនសន្ធឹកសន្ធាប់មក នាព្រឹកថ្ងៃទី២៤ ខែតុលា ឆ្នាំ២០១៩ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានធ្វើសន្និសីទសារព័ត៌មាន បង្ហាញមុខមេខ្លោងជួញដូរគ្រឿងញៀន និងថ្នាំញៀនដែលមានលក្ខណៈដ៏សំបើម ពុំដែលបង្ក្រាបបានក្នុងរយ:ពេលកន្លមក លើទឹកដីខេត្តកំពង់ធំគឺចំនួន៥៣កញ្ចប់ ទម្ងន់៥៣គីឡូក្រាម។
លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ មានប្រសាសន៍ ជាលទ្ធផល
ដែលទទួលបានជោគជ័យយ៉ាងគាប់ប្រសើរបំផុត គឺដោយមានការយកចិត្តទុកដាក់ដ៏ខ្ពង់ខ្ពស់របស់
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្តម នាយឧត្តមសេនីយ៍ ម៉ក់ ជីតូអគ្គស្នងការរងនគរបាលជាតិ ឯកឧត្តម ឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន ឯកឧត្តម សុខ លូ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ធំ។
ឯកឧត្តមតែងតែចង្អុលបង្ហាញដល់មន្ត្រីជំនាញនៃស្នងការដ្ឋាននគរបាលខេត្តកំពង់ធំ ដោយសារកម្លាំងមន្ទីរប្រឆាំងគ្រឿងញៀនក្រសួងមហាផ្ទៃ សហការជាមួយកម្លាំងជំនាញការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ធំ ដោយមានការសម្របសម្រួលនីតិវិធី ដោយផ្ទាល់ពីលោក ព្រះរាជអាជ្ញាអមសាលាដំបូង ខេត្តកំពង់ធំ និងលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ។
លោកឧត្តមសេនីយ៍ទោ អ៊ុក កុសល ស្នងការនគរបាលខេត្ត បានបញ្ជាក់ថា សមត្ថកិច្ចជំនាញ បានប្រើប្រាស់វិធានការជំនាញស្រាវជ្រាវបង្ក្រាបលើកទី១ នាថ្ងៃទី២១ ខែតុលា ឆ្នាំ២០១៩ វេលាម៉ោង ១៤ និង៣០ នាទី នៅចំណុចអាហាដ្ឋាន រស់ សុខុម ផ្លូវជាតិលេខ៦A ភូមិសំណាក ឃុំកកោះ ស្រុក សន្ទុក ខេត្តកំពង់ធំ ដោយឃាត់ខ្លួនជនសង្ស័យបានចំនួន០៤នាក់រួមមាន៖
១-ឈ្មោះ គង់ វណ្ណះ អាយុ៤០ឆ្នាំ រស់នៅខេត្តបាត់ដំបង។
២-ឈ្មោះ សុខ ប៊ុនសិរិឆ័យ អាយុ៤២ឆ្នាំ រស់នៅខេត្តបាត់ដំបង។
៣-ឈ្មោះលី តឹក អាយុ ៥៣ ឆ្នាំរស់នៅខេត្តបន្ទាយមានជ័យ។
៤-ឈ្មោះ សាក់ ស៊ាងសង អាយុ៣២ឆ្នាំ ជនជាតិថៃ រស់នៅប្រទេសថៃ និងដកហូតគ្រឿងញៀន ប្រភេទម៉េតំហ្វេតាមីនICEចំនួន៤០កញ្ចប់ មានទម្ងន់៤០គីឡូក្រាម រថយន្តចំនួន០២គ្រឿងកន្លងមក។
លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំបន្តថា បន្ទាប់មកសមត្ថកិច្ច
ជំនាញបានប្រើប្រាស់វិធានការជំនាញ ធ្វើការស្រាវជ្រាវស៊ើអង្កេតបន្តបន្ទាប់ និងដោយសារមានកិច្ចសហការពីប្រជាពលរដ្ឋគំរូធ្វើឱ្យសមត្ថកិច្ចយើងទទួលបានប្រភពព័ត៌មានច្បាស់លាស់។
នៅរសៀលថ្ងៃទី២៣ ខែតុលា ឆ្នាំ២០១៩ ដោយមានការសម្របសម្រួលនីតិវិធីពីលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ និងលោក សាយ វាសនា ព្រះរាជអាជ្ញាអមសាលាដំបូងខេត្តកំពង់ធំ កម្លាំងមន្ទីរប្រឆាំងគ្រឿងញៀនក្រសួងមហាផ្ទៃ បានសហការជាមួយកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកំពង់ធំ មានការចូលរួមពីអាជ្ញាធរដែនដី បានចុះឆែកឆេរ ផ្ទះមួយកន្លែងដែលលាក់ទុកនូវសារធាតុញៀនខុសច្បាប់ ស្ថិតក្នុងភូមិក្រសាំងខ ឃុំសាន់គរ ស្រុកកំពង់ស្វាយ ខេត្តកំពង់ធំ ដោយរកឃើញគ្រឿងញៀនប្រភេទម៉េតំហ្វេតាមីនICEចំនួន៥៣កញ្ចប់មានទម្ងន់៥៣គីឡូក្រាម បន្ថែមទៀតជាលទ្ធផលបង្ក្រាបលើកទី១គ្រឿងញៀនមានចំនួន៤០ កញ្ចប់ ទម្ងន់៤០គីឡូក្រាម និងលើកទី២ មានចំនួន៥៣កញ្ចប់ ទម្ងន់៥៣គីឡូក្រាម សរុបចំនួន៩៣ កញ្ចប់ ទម្ងន់៩៣គីឡូក្រាម។
ក្នុងនោះលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានសំណូមពរ ដល់ប្រជាពលរដ្ឋ ទាំងអស់សូមចូលប្រយុទ្ធប្រឆាំងបទល្មើសគ្រឿង យល់ដឹងផលប៉ះពាល់នៃគ្រឿងញៀន ហើយត្រូវយល់ថា គ្រឿងញៀន ជាថ្នាំឆ្កួត បំពុលស្មារតី បំផ្លាញ់អនាគត មនុស្សគ្រប់ៗគ្នា៕
