ចាប់ឃាត់ខ្លួនជនសង្ស័យ០១នាក់ ពាក់ពន្ឋ័ករណីហិង្សាដោយចេតនា
ខេត្តបន្ទាយមានជ័យ៖ជនសង្ស័យម្នាក់ ត្រូវបានកម្លាំងអន្តរាគមន៍កងរាជអាវុធហត្ថខេត្ត សហការជាមួយកម្លាំងជំនាញការិយាល័យបទល្មើសព្រហ្មទណ្ឌ ដឹកនាំដោយលោកវរសេនីយ៍ត្រី គុណ ណាវ នាយការិយាល័យបទល្មើសព្រហ្មទណ្ឌ នៃមន្ទីរយុត្តិធម៌ កងរាជអាវុធហត្ថខេត្ត ចុះចាប់ឃាត់ខ្លួនកាលពីវេលាម៉ោង១១ និង១៥នាទី ថ្ងៃទី០១ ខែតុលា ឆ្នាំ២០១៩ បន្ទាប់ពីទទួលបានពាក្យបណ្តឹងពីស្ត្រីរងគ្រោះជាប្រពន្ឋជនសង្ស័យ ពាក់ពន្ឋ័ករណីហិង្សាដោយចេតនា ប្រប្រឹត្តដោយសហព័ទ្ធ។
បើតាមលោកវរសេនីយ៍ត្រី គុណ ណាវ បានឲ្យដឹងថា៖យោងពាក្យបណ្តឹងរបស់ជនរងគ្រោះឈ្មោះ ហេម សាមុយ ភេទស្រី អាយុ ៣៧ឆ្នាំ ជនជាតិខ្មែរ ត្រូវជាភរិយារបស់ជនសង្ស័យ បច្ចុប្បន្នស្នាក់នៅភូមិភ្នំកន្ទួត សង្កាត់កំពង់ស្វាយ ក្រុងសិរីសោភ័ណ បានបំភ្លឺឲ្យដឹងថា ៖ជនសង្ស័យតែងតែវាយធ្វើបាបខ្លួនរាល់ពេលដែលគេស្រវឹង នៅអំឡុងឆ្នាំ២០០៨ ជនសង្ស័យត្រូវសមត្ថកិច្ចកោះហៅធ្វើកិច្ចសន្យាម្តងហើយ ប៉ុន្តែនៅតែវាយធ្វើបាបខ្លួនរាល់ពេលស្រវឹងដដែល។
លោកវរសេនីយ៍ត្រី គុណ ណាវ បានបន្តថា៖ក្រោយទទួលបានពាក្យបណ្តឹង កម្លាំងជំនាញកងរាជអាវុធហត្ថបានចុះធ្វើការស៊ើបអង្កេតរហូតឈានដល់កាឃាត់ខ្លួនជនបង្កឈ្មោះ ស៊ុន សំអូន ភេទប្រុស អាយុ៣៥ឆ្នាំ ជនជាតិខ្មែរ បច្ចុប្បន្នស្នាក់នៅភូមិ/សង្កាត់កើតហេតុខាងលើមកធ្វើការសាកសួរ។
ក្រោយពីសមត្ថកិច្ចជំនាញធ្វើការសាកសួរ ជនសង្ស័យបានសារភាពថា៖ខ្លួនពិតជាបានប្រព្រឹត្តដូចការចោទប្រកាន់របស់ប្រពន្ធពិតប្រាកដមែន។បច្ចុប្បន្នជនសង្ស័យត្រូវបានកម្លាំងជំនាញ កសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធី៕
![]()
![]()
![]()