ប្រកាសចូលកាន់មុខតំណែង នាយកសាលាមធ្យមសិក្សាសុខាភិបាល ភូមិភាគកំពត
ខេត្តកំពត៖នារសៀលថ្ងៃអង្គារ ៤កើត ខែអស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០២ ខែតុលា ឆ្នាំ២០១៩ ឯកឧត្តម សាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងឯកឧត្តម ជាវ តាយ អភិបាល នៃគណ:អភិបាលខេត្តកំពត បានអញ្ជើញជាអធិបតីក្នុងពិធីប្រកាសចូលកាន់មុខតំណែងនាយកសាលាមធ្យមសិក្សាសុខាភិបាលភូមិភាគកំពត។
ក្នុងពិធីនេះដែរមានការអញ្ជើញចូលរួមពី លោកស្នងការនគរបាលខេត្ត លោកបញ្ជាការតំបន់ប្រតិបត្តិការសឹករងខេត្ត លោកមេបញ្ជាការកងរាជអាវុធហត្ថខេត្ត លោក លោកស្រីនាយក នាយករងរដ្ឋបាលសាលាខេត្ត លោក លោកស្រីប្រធានមន្ទីរអង្គភាពជុំវិញខេត្ត លោក លោកស្រីអភិបាលក្រុង ស្រុក លោក លោកស្រីនាយកទីចាត់ការ អង្គភាពចំណុះសាលាខេត្តសរុបប្រមាណ២៥០នាក់។
ឯកឧត្តមអភិបាលខេត្ត បានកោតសរសេីរ និងវាយតម្លៃខ្ពស់ចំពោះគណ:គ្រប់គ្រងសាលា លោក លោកស្រី សាស្ត្រាចារ្យ និងមន្រ្តីគ្រប់ជាន់ថ្នាក់ក្នុងសាលាមធ្យមសិក្សាសុខាភិបាលភូមិភាគកំពត ដែលកន្លងមកបានសហការគ្នាបំពេញតួនាទីភារកិច្ចរបស់ខ្លួនយ៉ាងល្អប្រសើរ រួមចំណែកជាមួយរដ្ឋបាលខេត្ត ក្នុងការផ្តល់នូវពុទ្ធិ ចំណេះដឹង ក៏ដូចជាបទពិសោធន៍ល្អៗជូនដល់ក្មួយៗ ដើម្បីយកទៅបម្រើវិជ្ជាជីវ:ខាងផ្នែកសុខាភិបាលជូនប្រជាពលរដ្ឋនាពេលខាងមុខ។
ឯកឧត្តមបានមានប្រសាសន៍ផ្តាំផ្ញើដល់លោក មិន ជាតិ នាយកសាលាមធ្យមសិក្សាសុខាភិបាលភូមិភាគកំពតដែលត្រូវបានតែងតាំងនាពេលនេះថា៖
១.បន្តយកចិត្តទុកដាក់អនុវត្តឲ្យមានប្រសិទ្ធភាព និងស្មារតីទទួលខុសត្រូវខ្ពស់ ស្របតាមតួនាទីភារកិច្ចរៀងៗខ្លួន ព្រមទាំងពង្រឹងការអនុវត្តច្បាប់ លិខិតបទដ្ឋានគតិយុត្តិនានា និងគោលការណ៍ណែនាំផ្សេងៗ របស់រាជរដ្ឋាភិបាល ក្រសួងសុខាភិបាល និងរដ្ឋបាលខេត្ត។
២.ពង្រឹងសាមគ្គីភាព ឯកភាពផ្ទៃក្នុង ជាមួយគណ:គ្រប់គ្រងសាលា សាស្រ្តាចារ្យ សំដៅលើកស្ទួយកិត្យានុភាពថ្នាលបណ្តុះបណ្តាលមួយនេះឲ្យបានល្អប្រសើរ លុបបំបាត់រាល់ភាពអសកម្មទាំងឡាយ និងបង្កើនស្មារតីគោរពក្រមសីលធម៌វិជ្ជាជីវ:។
៣.បន្តអនុវត្តផែនការសកម្មភាព និងទិសដៅការងារដែលបានកំណត់សម្រាប់ឆ្នាំ២០២០ និងបណ្តាឆ្នាំខាងមុខ។
៤.យកចិត្តទុកដាក់ជំរុញលើកទឹកចិត្ត អប់រំណែនាំ ជួយបង្កលក្ខណ: និងផ្តល់ឱកាសការងារដល់មន្ត្រីវ័យក្មេង ដែលជាធនធានមនុស្សសម្រាប់បន្តវេន នៅថ្ងៃខាងមុខ។
៥.បន្តពង្រឹងទំនាក់ទំនងការងារជាមួយបណ្តារមន្ទីរអង្គភាពជុំវិញខេត្ត រដ្ឋបាលក្រុង ស្រុក និងឃុំ សង្កាត់លើគ្រប់ទិដ្ឋភាពការងារ៕