បុរសម្នាក់បានស្លាប់ភ្លាមៗ បន្ទាប់ពីសត្វគោមួយក្បាល ធាក់ចំចំណុចសំខាន់ នៅស្រុកកំពង់លែង
ខេត្តកំពង់ឆ្នាំង៖នេះគឺជារឿងមួយដ៏កម្រ ដោយសត្វគោ១ក្បាលបានធាក់ចំពងស្វាស របស់បុរសម្នាក់បណ្តាលឲ្យស្លាប់ភ្លាមៗ
កាលពីព្រឹកថ្ងៃទី២២ ខែតុលា ឆ្នាំ២០១៩ នៅចំណុចផ្ទះជនរងគ្រោះ ស្ថិតនៅក្នុងភូមិទំនប់ ឃុំត្រងិល ស្រុកកំពង់លែង ខេត្តកំពង់ឆ្នាំង។
សមត្ថកិច្ចបានឲ្យដឹងថា សពជនរងមានឈ្មោះ ឃុត សុធា ភេទប្រុស អាយុ៥៥ឆ្នាំ មានទីលំនៅ ក្នុងភូមិ ឃុំកើតហេតុខាងលើ។
បើតាមប្រភពធ័ត៌មានបានឲ្យដឹងថា មុនពេលកើតហេតុសត្វគោមួយក្បាល របស់ជនរងគ្រោះបានរួចទៅស៊ីដំណាំរបស់អ្នកជិតខាង នៅពេលនោះ ជនរងគ្រោះខឹងនឹងសត្វគោរបស់គាត់ខ្លាំង ក៏បានទៅចាប់យកគោនោះមកចង ហើយបានយករំពាត់វាយក្នុងបំណង ជាការព្រមានដើម្បីឲ្យរាងចាល ខណៈដែលរូបគាត់កំពុងតែវាយគោ មិនបានប្រយ័ត្ន ក៏ត្រូវបានសត្វគោ១ក្បាលនេះ ធាក់ចំពងស្វាសរបស់គាត់ មួយជើងយ៉ាងខ្លាំង បណ្តាលឱ្យជនរងគ្រោះ ចុកប្រកាច់ ដាច់ខ្យល់ស្លាប់ភ្លាមៗ នៅកន្លែងកើតហេតុនោះតែម្ដង។
ក្រោយកើតហេតុភ្លាមសមត្ថកិច្ចក៏បានចុះធ្វើកោសល្យវិច្ច័យទៅលើសាកសព ជាលទ្ធផលថា ជនរងគ្រោះពិតជាបានស្លាប់ ដោយសារសត្វគោ១ក្បាលនេះ ធ្លាក់ចំចំណុចសំខាន់ បណ្ដាលឱ្យស្លាប់ពិតប្រាកដមែន ហើយក៏បានប្រគល់សាកសព ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕