ឃាត់ខ្លួន បុគ្គលិកហាងខារ៉ាអូរខេយីហោ ពិភពKTV ម្នាក់ ខណៈធ្វើសកម្មភាពលួចម៉ូតូ ជាងភ្លើងម្នាក់
រាជធានីភ្នំពេញ៖បុគ្គលិកហាងខារ៉ាអូរខេយីហោ ពិភពKTV ត្រូវកម្លាំងនគរបាលខណ្ឌសែនសុខ ចាប់ឃាត់ខ្លួនបន្ទាប់ពីធ្វើសកម្មភាពលួចម៉ូតូជាងភ្លើងម្នាក់ បានសម្រេច ហើយប្រុងជិះរត់គេចខ្លួនក៏ត្រូវជនរងគ្រោះឃើញទាន់ស្រែកឆោឡោ ផ្អើលសមត្ថកិច្ចកំពុងល្បាតក្បែរនោះជួយធ្វើអន្តរាគមន៍ចាប់បានភ្លាមៗតែម្តង។
ការឃាត់ខ្លួនបានធ្វើឡើងកាលពីវេលាម៉ោងជាង៤រសៀល ថ្ងៃទី២០ ខែតុលា ឆ្នាំ២០១៩ នៅត្រង់ចំណុចមុខបន្ទប់ជួលលេខ៤ ស្ថិតនៅក្នុងភូមិសេប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
បើតាមសមត្ថកិច្ចបានឲ្យដឹងថា ជនសង្ស័យមានឈ្មោះ ស៊ុ បញ្ញា ភេទប្រុស អាយុ៣០ឆ្នាំ ជនជាតិខ្មែរ មុខរបរគ្មាន ស្នាក់នៅក្នុងហាងខារ៉ាអូរខេ ពិភពKTV ផ្លូវ២០០៤ ភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។ចំណែកជនរងគ្រោះឈ្មោះ ផន សីហា ភេទប្រុស អាយុ២០ឆ្នាំ ជនជាតិខ្មែរ មុខរបរជាងភ្លើង រស់នៅភូមិ/ឃុំខាងលើ។
វត្ថុតាងដកហូតបានរួមមាន៖កូនសោបន្ទប់ជួល២,កូនសោចាក់ម៉ូតូចំនួន៤,ម៉ូតូម៉ាកគប់ជ្រុង១គ្រឿង ពណ៌បៃតង សេរីចាស់ ពាក់ស្លាក់លេខព្រៃវែង1C-1639 របស់ជនរងគ្រោះ។
បច្ចុប្បន្ន ជនសង្ស័យត្រូវបានសមត្ថកិច្ចកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធី៕