ប្រកាសផ្លាស់ប្ដូរ និងទទួលស្គាល់សមាសភាព ក្រុមប្រឹក្សាស្រុកម៉ាឡៃ
ខេត្តបន្ទាយមានជ័យ៖នារសៀលថ្ងៃព្រហស្បតិ៍ ៤រោច ខែអស្សុជ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១៧ ខែតុលា ឆ្នាំ២០១៩ ឯកឧត្តម អ៊ុំ រាត្រី អភិបាល នៃគណៈអភិបាលខេត្ត ឯកឧត្តម ប្លែក វ៉ារី សមាជិកក្រុមប្រឹក្សាខេត្ត តំណាងដ៏ខ្ពង់ខ្ពស់ ឯកឧត្តម ខេង ស៊ុម ប្រធានក្រុមប្រឹក្សាខេត្ត បានអញ្ជើញជាអធិបតីក្នុងពិធីប្រកាសផ្លាស់ប្ដូរ និងទទួលស្គាល់សមាសភាពក្រុមប្រឹក្សាស្រុកម៉ាឡៃ ស្ថិតនៅក្នុងបរិវេណសាលាស្រុកម៉ាឡៃ ខេត្តបន្ទាយមានជ័យ។
ឯកឧត្តម អ៊ុំ រាត្រី បានមានប្រសាសន៍ កោតសរសើរចំពោះ រដ្ឋបាលស្រុកម៉ាឡៃ ដែលបានខិតខំបំពេញ តួនាទីភារកិច្ច កិច្ចការងាររដ្ឋបាល ការផ្តល់សេវា សាធារណៈជូនប្រជាពលរដ្ឋ ការខិតខំអភិវឌ្ឍន៍ហេដ្ឋារចនាសម្ព័ន្ធនានា ការថែរក្សាការពារសន្តិសុខ សណ្ដាប់ធ្នាប់ ការឆ្លើយតបទៅនឹងតម្រូវការរបស់ប្រជាពលរដ្ឋ ក្នុងស្រុកម៉ាឡៃនាពេលកន្លងមក។
ក្នុងនោះឯកឧត្តម បានថ្លែងសង្ឃឹមយ៉ាងមុតមាំថា ក្រុមប្រឹក្សា គណៈអភិបាល មន្ត្រីរាជការគ្រប់លំដាប់ថ្នាក់ កងកម្លាំងមានសមត្ថកិច្ច និងប្រជាពលរដ្ឋទូទាំងស្រុកម៉ាឡៃ បន្តរួមសាមគ្គី សហការគ្នាបំពេញការងារ ខិតខំប្រឹងប្រែងយ៉ាងសកម្មក្នុងការកសាង ការអភិវឌ្ឍឱ្យមានការរីកចំរើនលើគ្រប់វិស័យសំដៅធ្វើយ៉ាងណាឲ្យសម្រេច គោលដៅមូលដ្ឋានមានការអភិវឌ្ឍ និងជីវភាពរស់នៅរបស់ប្រជាពលរដ្ឋ ឲ្យកាន់តែប្រសើរឡើង ដើមី្បសម្រេចបាននូវសមទ្ធិផលថ្មីៗបន្ថែមទៀត និងដើម្បីរួមចំណែកក្នុងការអភិវឌ្ឍន៍ប្រទេសជាតិឱ្យមានការរីកចម្រើន កាន់តែខ្លាំងក្នុងរយៈពេល៥ឆ្នាំខាងមុខនេះ៕