ជនសង្ស័យចំនួន២នាក់ ក្នុងចំណោមបក្ខពួក៥នាក់ ត្រូវបានកម្លាំងស្រុកខ្សាច់កណ្តាល ចាប់ឃាត់ខ្លួន ពាក់ពន្ឋករណីប្រើអំពើហិង្សា
ខេត្តកណ្ដាល៖កម្លាំងសមត្ថកិច្ច ស្រុកខ្សាច់កណ្តាល បានចុះចាប់ឃាត់ខ្លួនជនសង្ស័យចំនួន២នាក់ ក្នុងចំណោមបក្ខពួក៥នាក់ បន្ទាប់ពីប្រើហិង្សា ដោយយកឈើជ្រុងវាយជនរងគ្រោះ ត្រូវចំភ្នែកខាងស្ដាំ បណ្ដាលឲ្យហើមប៉ោងចេញឈាម។
ករណីហឹង្សានេះបានកើតឡើងកាលពីថ្ងៃទី៣០ ខែកញ្ញា ឆ្នាំ២០១៩ ស្ថិតភូមិឃ្លាំងមឿងជើង ឃុំព្រែកអំពិល ស្រុកខ្សាច់កណ្តាល ខេត្តកណ្តាល។
បើតាមសមត្ថកិច្ចបានឲ្យដឹងថា៖ជនរងគ្រោះមានឈ្មោះ ណាង បារាំង ភេទប្រុស អាយុ២០ឆ្នាំ ជនជាតិខ្មែរ មុខរបរកសិករ រស់នៅភូមិ/ឃុំកើតហេតុ របួសហើមប៉ោងភ្នែកខាងស្តាំ១កន្លែង។
ចំណែកជនសង្ស័យទាំង៥នាក់រួមមាន៖
ទី១/ឈ្មោះ គង់ ភណ្ឌ័ ហៅ កាណុង ភេទប្រុស អាយុ២៤ឆ្នាំ ជនជាតិខ្មែរ មុខរបរ ជាងដែក (ឃាត់ខ្លួន)។
ទី២/ឈ្មោះ យ៉ុន វណ្ណា ភេទប្រុស អាយុ៣២ឆ្នាំ ជនជាតិខ្មែរ មុខរបរ កសិករ(ឃាត់ខ្លួន)។
ទី៣/ឈ្មោះ យ៉ុន ផល្លី ភេទប្រុស អាយុ២៤ឆ្នាំ ជនជាតិខ្មែរ មុខរបរ កសិករ(គេចខ្លួន)។
ទី៤/ឈ្មោះ យ៉ុន ផលឡី ភេទប្រុស អាយុ២៧ឆ្នាំ ជនជាតិខ្មែរ មុខរបរ កសិករ(គេចខ្លួន)។
ទី៥/ឈ្មោះ ម៉ុន ម៉ឺន ហៅ បឿក ភេទប្រុស អាយុ១៨ឆ្នាំ ជនជាតិខ្មែរ មុខរបរ កសិករ (គេចខ្លួន)។ អ្នកទាំង៥រស់នៅភូមិ/ឃុំខាងលើ។
សមត្ថកិច្ចបញ្ជាក់ថា៖មុនពេលកើតហេតុ ជនរងគ្រោះ និងមិត្តភក្ដិ បានទៅរុញទូកពីមាត់ទន្លេ យកទៅទុកមកដល់ផ្លូវ៣៨០ ជនសង្ស័យទី៣ បានជិះម៉ូតូពីត្បូងមកជើង ឃើញដូចនេះ ជនរងគ្រោះលើកដៃជាសញ្ញាកុំឲ្យជនសង្ស័យទី៣ មកទៀតខ្លាចបុកទូក តែជនសង្ស័យមិនស្ដាប់នូវជ្រែងម៉ូតូជិះវាងទូក ហើយជេរប្រមាថទៅលើជនរងគ្រោះ បន្ទាប់មកជិះម៉ូតូទៅបាត់។លុះវេលាយប់ឡើង ជនរងគ្រោះជិះម៉ូតូទៅមើលធុងបាស់ ហើយក្រុមជនសង្ស័យក៏ទៅដែរ ខណ:វេលាកើតហេតុ ស្រាប់តែជនសង្ស័យទី៣ កាន់ដំបងឈើជ្រុងវាយទៅលើជនរងគ្រោះ ត្រូវភ្នែកខាងស្ដាំ បណ្ដាលឲ្យហើមប៉ោងចេញឈាម ភ្លាមនោះជនរងគ្រោះបានរត់ឲ្យគេជួយ ទើបក្រុមជនសង្ស័យគេចខ្លួនបាត់។
ក្រោយពីទទួលបានពាក្យបណ្ដឹងពីជនរងគ្រោះកម្លាំងសមត្ថកិច្ចបានចុះធ្វើការឃាត់ខ្លួនជនសង្ស័យ មកសាកសួ ដើម្បីកសាងសំណុំរឿងចាត់ការតាមនិតិវិធី៕