ចេញពីពន្ធនាគារបាន៤ឆ្នាំ មិនរាងចាល បង្កហិង្សា ត្រូវសមត្ថកិច្ចចាប់ឃាត់ខ្លួន
ខេត្តកណ្ដាល៖ជនសង្ស័យម្នាក់ជាមុខសញ្ញាជាប់ពន្ធនាគារ កាលពីឆ្នាំ២០០៤ រយ:ពេល១២ឆ្នាំ ករណីមនុស្សឃាត នៅស្រុកលើកដែក ដែលចេញពីគុកបានរយៈ៤ឆ្នាំប៉ុណ្ណោះ ត្រូវសមត្ថកិច្ចបន្តធ្វើការឃាត់ខ្លួន បន្ទាប់ពីបង្កហិង្សា ទៅលើជនរងគ្រោះឈ្មោះ ថុល ចាន់ថន ភេទប្រុស អាយុ៣២ឆ្នាំ ជនជាតិខ្មែរ មុខរបរនេសាទ។
ការឃាត់ខ្លួននេះបានធ្វើឡើងកាលពីវេលាម៉ោងជាង១៨ថ្ងៃទី៣០ ខែកញ្ញា ឆ្នាំ២០១៩ នៅចំណុចភូមិកំពង់ពោធិ៍ ឃុំកំពង់ភ្នំ ស្រុកលើកដែក ខេត្តកណ្តាល ។
សមត្ថកិច្ចបានឲ្យដឹងថា៖ជនសង្ស័យមានឈ្មោះ ពេញ វ៉ាន់ ភេទប្រុស អាយុ៣៩ឆ្នាំ ជនជាតិខ្មែរ រស់នៅភូមិ/ឃុំខាងលើ។
ក្រោយពីឃាត់ខ្លួនសមត្ថកិច្ចដកហូតបានវត្ថុតាងរួមមានៈកាំបិតផ្គាក់កកុកប្រវែង៧៨សង់ទីម៉ែត្រ ដងធ្វើពីឬស្សីប្រវែង៥៣សង់ទីម៉ែត្រ និងផ្លែដែកប្រវែង២៥សង់ទីម៉ែត្រចំនួន១។
បើតាមប្រភពពីកន្លែងកើតហេតុ បានឲ្យដឹងថា៖ នៅថ្ងៃកើតហេតុជនរងគ្រោះ និងជនសង្ស័យ បក្ខពួកចំនួន៦នាក់ទៀតបានផឹកស្រាជាមួយគ្នា នៅផ្ទះរបស់ឈ្មោះ ខឿន លុះផឹកស៊ីរួចក៏បំបែកគ្នាទៅផ្ទះរៀងៗខ្លួន ដោយពុំមានទាស់ទែងពាក្យសម្ដីអ្វីឡើយ មួយសន្ទុះក្រោយមកជនរងគ្រោះឃើញជនសង្ស័យអង្គុយនៅមុខផ្ទះ អ្នកលក់ចាប់ហួយមួយកន្លែង ក៏សួរជនសង្ស័យថា បងមិនទៅផឹកទៀតទេឬក៏ស្រាប់តែជនសង្ស័យស្ទុះយកកាំបិតមកភ្ជុងក.ជនរងគ្រោះបម្រុងអារ.ក ភ្លាមៗនោះជនរងគ្រោះ ភ័យបានរើបម្រាស់ចេញដោយប្រតាយប្រតប់គ្នា បណ្តាលឲ្យត្រូវជនរងគ្រោះដាច់ស្បែកត្រង់ក ផ្នែកខាងស្តាំប្រវែង៨,៥សង់ទីម៉ែត្រ បន្ទាប់ពីរើរួចជនរងគ្រោះ បានរត់ទៅប្តឹងសមត្ថកិច្ចឲ្យចុះអន្តរាគមន៍ រហូតឈានដល់ការឃាត់ខ្លួនជនសង្ស័យតែម្តងទៅ៕