ខេត្តបន្ទាយមានជ័យ៖នាព្រឹកថ្ងៃទី២០ ខែឧសភា ឆ្នាំ២០២៥ រដ្ឋបាកខេត្តបន្ទាយមានជ័យ បានរៀបចំប្រារព្ធខួបលើកទី៨ ទិវាជាតិនៃការចងចាំពីថ្ងៃទី៨ ខែឧសភា ឆ្នាំ២០២៥ នៅបរិវេណវត្តសុភមង្គល ក្នុងក្រុងសិរីសោភ័ណ ក្រោមអធិបតីភាពឯកឧត្ដម ប្ល៉ែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ។ កម្មវិធី ក៏បានរៀបចំទៅតាមការគ្រោងទុក មានពិធីដាក់កម្រងផ្កា និងអុជធូបគោរពវិញ្ញាណក្ខន្ធ ពិធីបង្សុកូល កុសលផលបុណ្យជូនដល់វិញ្ញាណក្ខន្ធអ្នកដែលបានស្លាប់ក្នុងរបបប្រល័យពូជសាសន៍ប៉ុលពតចន្លោះឆ្នាំ១៩៧៥ដល់ឆ្នាំ១៩៧៩ ដែលជារបបយង់ឃ្នងប្រល័យពូជសាសន៍ឯង សម្លាប់ប្រជាជនស្លូតត្រង់អស់រាប់លាននាក់។
នាឱកាសនោះឯកឧត្តម អ៊ុំ រាត្រី អភិបាលខេត្ត បានអានសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលមានខ្លឹមសារបញ្ជាក់ថា មូលហេតុនៃការកំណត់យកថ្ងៃ២០ ឧសភា ជាទិវាជាតិនៃការចងចាំមានពីរ ទី១ ថ្ងៃទី២០ ខែឧសភា ឆ្នាំ១៩៧៣ ជាថ្ងៃបង្កើតសហករណ៍ ដើម្បីប្រមូលផ្ដុំប្រជាជនធ្វើការងារ សាមគ្គី លុបបំបាត់កម្មសិទ្ធិឯកជន នៅក្នុងតំបន់មួយចំនួនដែលហៅថាតំបន់រំដោះដែលស្ថិតនៅក្រោមការគ្រប់គ្រងនៃកងទ័ពរំដោះខ្មែរក្រហមគោលនយោបាយនេះ ត្រូវបានចាប់ផ្ដើមអនុវត្តជាថ្មី នៅឆ្នាំ១៩៧៦ បន្ទាប់ពីខ្មែរក្រហមឡើងគ្រប់គ្រងអំណាចចាប់ពីថ្ងៃទី១៧ ខែមេសា ឆ្នាំ១៩៧៥ រហូតដល់ថ្ងៃទី៦ ខែមករា ឆ្នាំ១៩៧៩។ ទី២ មុនពេលឈានដល់ថ្ងៃជ័យជំនះថ្ងៃទី១៧ ខែមេសា ឆ្នាំ១៩៧៥ ពោលគឺពីចន្លោះថ្ងៃទី២០ ដល់ថ្ងៃទី២៥ ខែឧសភា ឆ្នាំ១៩៧៩ ក្រុមមេដឹកនាំរបបកម្ពុជាប្រជាធិបតេយ្យ ប៉ុលពតនិង នួនជា បានរៀបចំផែនការនិងប្រព្រឹត្តឧក្រិដ្ឋកម្មប្រឆាំងមនុស្សជាតិឧក្រិដ្ឋកម្មសង្គ្រាមនិងឧក្រិដ្ឋកម្មប្រល័យពូជសាសន៍ជាទ្រង់ទ្រាយធំ ដែលក្នុងនោះ ការជម្លៀសដោយបង្ខំពីទីក្រុង និងភូមិនានាពលកម្មដោយបង្ខំ និងការធ្វើបាននៅតាមការដ្ឋានការងារនិងសហករណ៍ការចាប់ខ្លួនតាមអំពើចិត្តការធ្វើទារុណកម្ម ការបាត់ខ្លួននិងការសម្លាប់ ការរៀបអាពាហ៍ពិពាហ៍ដោយបង្ខំ និងការរើសអើងប្រឆាំងនឹងមនុស្សមួយចំនួនដែលពួកគេចាត់ទុកថាជាខ្មាំង។ ប្រជាជនស្លូតត្រង់ ប្រមាណជាង ១,៧លាននាក់ បានស្លាប់ក្នុងរបបខ្មែរក្រហម ដូច្នេះដើម្បីកុំឲ្យរបបនេះវិលមកវិញយើងទាំងអស់គ្នា ត្រូវចូលរួមថែរក្សាការពារសន្តិភាពឱ្យបានស្ថិតស្ថេរគង់វង្ស ពីព្រោះសន្តិភាពបានផ្តល់នូវឱកាសគ្រប់យ៉ាងក្នុងការកសាងសង្គមគ្រួសារ សហគមន៍ នៅក្នុងប្រទេសជាតិឲ្យកាន់តែមានភាពរីកចម្រើនដោយហេតុថា បើគ្មានសន្តិភាពគឺមានសង្គ្រាម ហើយសង្គ្រាមនិងធ្វើឲ្យប្រទេសជាតិកាន់តែក្រីក្រអសន្តិសុខ គ្មានសុវត្ថិភាព គ្មានការអភិវឌ្ឍ។ អាចនិយាយបានថា សន្តិភាពគឺជាសក្ដានុពលនិងជាសកម្មភាពគ្រប់យ៉ាង ដើម្បីការរីកចម្រើនទៅមុខ របស់ប្រទេសជាតិ ។ បញ្ចប់នៃកម្មវិធី គណអធិបតីបានប្រគល់អំណោយ ដល់តាជីយាយជី និងពិធីរាប់បាត្រដល់ព្រះសង្ឃចំនួន ១០៨អង្គផងដែរ៕
