ខេត្តបន្ទាយមានជ័យ៖នាវេលាម៉ោង០០ និង១០នាទី ថ្ងៃទី២០ ខែមករា ឆ្នាំ២០២៥ មានករណីគ្រោះថ្នាក់ចរាចរណ៍មួយបានកើតឡើង ដោយរថយន្តមួយគ្រឿងបានបើកបុកបុរសម្នាក់ ខណៈកំពុងដើរតាមបណ្តោយផ្លូវជាតិលេខ៥ ត្រង់ចំណុចខាងកើតមូលដ្ឋានកងរាជអាវុធហត្ថក្រុងប៉ោយប៉ែត ប្រហែល២០០ម៉ែត្រ ស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បណ្តាលឲ្យស្លាប់ភ្លាមៗនៅនឹងកន្លែង ។ក្រោយពីកើតហេតុរថយន្តបង្កបានបើកគេចខ្លួនដោយបន្សល់ទុកជនរងគ្រោះដេកស្លាប់នៅក្នុងថ្លុងឈាម ។
បើតាមប្រភពព័ត៌មានបានឲ្យដឹងថា មុនពេលកើតហេតុមានបុរសម្នាក់ មិនស្គាល់អត្តសញ្ញាណ សង្ស័យជាជនអណាថា បានដើរតាមបណ្តោយផ្លូវជាតិលេខ៥ ទិសដៅពីលិចទៅកើត លុះដល់ចំណុចកើតហេតុខាងលើ ក៏ស្រាប់តែមានរថយន្តធុនតូចមួយគ្រឿង(ក្តាប់ភិនភាគ និងផ្លាកលេខពុំបាន) បើកបរពីលិចទៅកើតក្នុងល្បឿនយ៉ាងលឿន បានបុកពេញទំហឹង បណ្តាលឲ្យស្លាប់នៅនឹងកន្លែងកើតហេតុ ហើយរថយន្តបានបើករត់គេចចេញពីកន្លែងកើតហេតុបាត់ស្រមោល។
ក្រោយពីទទួលបានព័ត៌មាននេះភ្លាមកម្លាំងនគរបាលចរាចរណ៍ផ្លូវគោក នៃអធិការដ្ឋាននគបាលក្រុងប៉ោយប៉ែតបានចុះធ្វើអន្តរាគម ដោយធ្វើការសម្រួលចរាចរណ៍ និងយកសាកសពទៅតំកល់ទុកនៅវត្តប្រជាធម្ម ដើម្បីស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណ៍ ។ដោយឡែករថយន្តបង្កដែលបើករត់គេចនោះ កម្លាំងជំនាញកំពុងធ្វើការស្រាវជ្រាវតាមរក៕
