រដ្ឋបាលខេត្តព្រះសីហនុ និងក្រសួងអប់រំយុវជន និងកីឡា បើកព្រឹត្តិការណ៍ប្រកួតកីឡាម៉ូតូទឹកកម្ពុជា ឆ្នាំ២០២២ នៅឆ្នេរអូរត្រេះ
(ខេត្តព្រះសីហនុ)៖ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ និងឯកឧត្តម ណុះ ស្លេស រដ្ឋលេខាធិការក្រសួងអប់រំ ជាប្រធានសហព័ន្ធកីឡាម៉ូតូទឹកកម្ពុជា នាព្រឹកថ្ងៃទី២០ ខែឧសភា ឆ្នាំ២០២២ អញ្ជើញបើកព្រឹត្តិការណ៍ប្រកួតកីឡាម៉ូតូទឹកកម្ពុជាឆ្នាំ២០២២ នៅឆ្នេរអូរត្រេះ ស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ។
ឯកឧត្តម ណុះ ស្លេស រដ្ឋលេខាធិកា ក្រសួងអប់រំយុវជន និងកីឡា និងជាប្រធានសហព័ន្ធកីឡាម៉ូតូទឹកកម្ពុជា បានមានប្រសាសន៍ថា ព្រឹត្តិការណ៍ប្រកួតកីឡាម៉ូតូទឹកកម្រិតអន្តរជាតិឆ្នាំ២០២២ Cambodia International JET SKI Championship 2022 សហព័ន្ធកីឡាម៉ូតូទឹកកម្ពុជា បានរៀបចំព្រឹត្តិការណ៍ប្រកួតកីឡាម៉ូតូទឹកកម្រិតអន្តរជាតិឆ្នាំ២០២២ ប្រព្រឹត្តទៅចាប់ពីថ្ងៃទី១៨ ដល់ថ្ងៃទី២២ ខែឧសភា ឆ្នាំ២០២២ នៅខេត្តព្រះសីហនុ។ព្រឹត្តិការណ៍ប្រកួតកីឡាម៉ូតូទឹកកម្រិតអន្តរជាតិឆ្នាំ២០២២ មានប្រតិភូកីឡាករ កីឡាការិនីចូលរួមចំនួន ៦០នាក់ មកពី៤ប្រទេស ក្នុងនោះមាន កម្ពុជា ឥណ្ឌូណេស៊ី ម៉ាឡេស៊ី និងថៃ។ការប្រកួតមាន ៧វិញ្ញាសា ក្នុងនោះគណៈកម្មការបច្ចេកទេសអន្តរជាតិមាន១៣នាក់ និងគណៈកម្មការថ្នាក់ជាតិមាន៣៥នាក់។ ព្រឹត្តិការណ៍ប្រកួតកីឡាដ៏ធំនេះរៀបចំ ឡើងក្នុងគោលបំណងសំខាន់៣
១.វាស់ស្ទង់សមត្ថភាពកីឡាករ និងគុណផលកីឡាសម្រាប់ត្រៀមដណ្ដើមមេដាយនៅស៊ីហ្គេមលើកទី៣២ ឆ្នាំ២០២៣។
២.វាស់ស្ទង់សមត្ថភាពគណៈកម្មការបច្ចេកទេសរៀបចំព្រឹត្តិការណ៍ប្រកួត និង ៣.ចូលរួមចំណែកទាក់ទាញភ្ញៀវទេសចរជាតិ អន្តរជាតិមកទស្សនាកម្ពុជា បង្ហាញពីការចាប់ផ្ដើមស្តារសង្គម-សេដ្ឋកិច្ចឡើងវិញក្នុង និងក្រោយស្ថានភាពវិបត្តិកូវីដ-១៩។)
ឯកឧត្តម គួច ចំរើន អភិបាលខេត្តព្រះសីហនុ មានប្រសាសន៍ថា ការរៀបចំការប្រកួតកីឡាម៉ូតូទឹកកម្រិតអន្តរជាតិឆ្នាំ២០២២ នៅខេត្តព្រះសីហនុ គឺស្របពេលដែលរាជរដ្ឋាភិបាលបើកដំណើរការប្រទេស និងសង្គមសេដ្ឋកិច្ចឡើងវិញ សកម្មភាពកីឡាចាប់ផ្តើមដំណើរការហ្វឹកហាត់ រៀបចំព្រឹត្តិការណ៍កីឡាតាមគន្លងប្រក្រតីភាពថ្មី ព្រឹត្តិការណ៍នេះ ក្នុងគោលបំណងបង្ហាញការចាប់ផ្តើមស្តារសង្គម-សេដ្ឋកិច្ច ក្នុងពេលដែលប្រទេសជាតិមានសន្តិភាពពេញលេញ និងការអភិវឌ្ឍន៍លើគ្រប់វិស័យ។គោលនយោបាយជាតិ ស្ដីពីការអភិវឌ្ឍវិស័យកីឡាសំដៅធានាកសាងធនធានមនុស្សឱ្យមានសុខភាពល្អសមត្ថភាព និងសីលធម៌ខ្ពស់ស្របតាមបរិបទកម្ពុជា ក្នុងការត្រៀមលក្ខណៈធ្វើជាម្ចាស់ផ្ទះនៃការប្រកួតកីឡាស៊ីហ្គេមលើកទី៣២ ឆ្នាំ២០២៣។ វិស័យអប់រំ និងកីឡាបានរួមចំណែកលើកកម្ពស់សុខភាព និងសុខុមាលភាពសិស្ស និស្សិត ប្រជាជនកាត់បន្ថយភាពអសកម្មផ្សេងៗក្នុងសង្គម ជាអាទិ៍ការប្រើប្រាស់គ្រឿងញៀន៕
