គ្រាប់យុទ្ធភ័ណ្ឌ មិនទាន់ផ្ទុះចំនួន១៨គ្រាប់ ត្រូវបានប្រជាពលរដ្ឋ នៅស្រុកស្វាយចេកប្រទះឃើញ ខណៈកំពុងភ្ជួរស្រែ
ខេត្តបន្ទាយមានជ័យ៖គ្រាប់យុទ្ធភ័ណ្ឌមិនទាន់ផ្ទុះដែលនៅសេះសល់កាលពីសម័យសង្គ្រាម ត្រូវបានប្រជាពលរដ្ឋរស់នៅភូមិតាដួល ឃុំផ្គាំ ស្រុកស្វាយចេក ខេត្តបន្ទាយមានជ័យ ប្រទះឃើញចំនួន១៨គ្រាប់ ក្នុងខណៈកំពុងភ្ជួរធ្វើស្រែនៅខាងកើតភូមិចម្ងាយ១,០០០មែត្រ បង្កការភ្ញាក់ផ្អើលនេះ បានកើតឡើងកាលពីវេលាម៉ោង១០និង២៣នាទីព្រឹក ថ្ងៃទី២៥ ខែមករា ឆ្នាំ២០២២។
លោកវរសេនីយ៍ឯក ជា ស្លូញ អធិការនគរបាល ស្រុកស្វាយចេក បានឲ្យដឹងថា៖ក្រោយពីទទួលបាននូវសេចក្តីរាយការណ៍ពីប្រជាពលរដ្ឋជាម្ចាស់ស្រែឈ្មោះ សុំាង ចាយ ភេទប្រុស អាយុ៣៥ឆ្នាំ រស់នៅភូមិ ឃុំខាងលើ កម្លាំងនគរបាលប៉ុស្តិ៍ឃុំផ្គាំ បានចុះត្រួតពិនិត្យ រួចរាយការជូនក្រុមស៊ីម៉ាក ដើម្បីយកទៅកំទិចចោល។
លោកអធិការបានបញ្ជាក់ថា៖តាមការបំភ្លឺពីប្រជាពលរដ្ឋជាម្ចាស់ស្រែបានឲ្យដឹងថា ស្រែដែលបានភ្ជួរស្រែនោះ គាត់ធ្វើជារៀងរាល់ឆ្នាំ ប៉ុន្តែឆ្នាំនេះដោយមានបំណងចង់ពង្រីកដីស្រែគាត់ក៏បានយកត្រាក់ទ័រមកភ្ជួរវៀលដីដំបូកក្នុងស្រែឲ្យកាន់តែធំ ក៏ស្រាប់តែប្រទះឃើញគ្រាប់ទាំងនោះ រួចបានរាយការណ៍ទៅនគរបាលប៉ុស្តិ៍ឃុំផ្គាំ។
គ្រាប់យុទ្ធភ័ណ្ឌទាំងនោះរួមមាន៖១-ប្រភេទដេកា៨២ចំនួន១៥គ្រាប់,២-ប្រភេទមីន៦៩ចំនួន១គ្រាប់,៣-ប្រភទ៦០មមចំនួន២គ្រាប់។បន្ទាប់ពីនគរបាលប៉ុស្តិ៍រាយការណ៍ ក្រុមស៊ីម៉ាក បានចុះពិនិត្យរួចក៏បានប្រមូលយកទៅ ដើម្បីយកទៅកំទេចចោលនាពេលក្រោយ៕
.jpg)