ពិធីបើកបវេសនកាល សម្រាប់ឆ្នាំសិក្សាថ្មី២០២១-២០២២ នៅវិទ្យាល័យ ជា ស៊ីម ព្រែកអញ្ចាញ ក្នុងស្រុកមុខកំពូល
ព្រឹកថ្ងៃចន្ទ ៨រោច ខែបុស្ស ឆ្នាំឆ្លវ ត្រីស័ក ព.ស ២៥៦៥ ត្រូវនឹងថ្ងៃទី១០ ខែមករា ឆ្នាំ២០២២ ឯកឧត្តម គង់ អៀង អនុប្រធានក្រុមការងារចុះមូលដ្ឋានស្រុកមុខកំពូល និងលោក យី យ៉េន អភិបាល នៃគណៈអភិបាលស្រុកមុខកំពូល បានអញ្ជើញ ជាអធិបតី ភាពដ៏ខ្ពង់ខ្ពស់ ក្នុងកម្មវិធីបើកបវេសនកាល សម្រាប់ឆ្នាំសិក្សាថ្មី ២០២១-២០២២ ទូទាំងស្រុកមុខកំពូល ដោយមានការអញ្ជើញចូលរួមពីសំណាក់ លោក ពៅ វណ្ណា ប្រធានការិយាល័យកីឡា នៃមន្ទីរអប់រំយុវជន និងកីឡាខេត្តកណ្តាល លោក លោកស្រី អភិបាលរងស្រុក លោក លោកស្រី មន្ត្រីការិយាល័យអប់រំ យុវជន និងកីឡាស្រុក កងកម្លាំងទាំងបី មន្ត្រី រដ្ឋបាលស្រុក លោកមេឃុំ លោកគ្រូ អ្នកគ្រូ និងសិស្សានុសិស្ស ទូទាំងស្រុកមុខកំពូលនិងបានធ្វើពិធីប្រគល់ប័ណ្ណសរសើរ និងវត្ថុអនុស្សាវរីយ៍ លើកទឹកចិត្តដល់លោកគ្រូ អ្នកគ្រូ និងសិស្សពូកែទូទាំងវិទ្យាល័យក្នុងស្រុក។
ឯកឧត្ដមបន្តថានេះ គឺជាការខិតខំប្រឹងប្រែង គិតគូយ៉ាងយកចិត្តទុកដាក់ដ៏ខ្ពង់ខ្ពស់ ប្រកបដោយគតិបណ្ឌិត របស់សម្តេចតេជោ នាយករដ្ឋមន្រ្តី នៃព្រះរាជាណាចក្រកម្ពុជា ដែលបានចាត់វិធានការទាន់ពេលវេលា ក្នុងការគ្រប់គ្រង ដាក់វិធានការទប់ស្កាត់ការរីករាលដាលជំងឺកូវីដ-១៩ និងខិតខំស្វែងរកវ៉ាក់សាំងចាក់ជូនប្រជាពលរដ្ឋទូទាំងប្រទេសដោយមិនរើសអើង រហូតសម្តេច ប្រកាសបិទព្រឹត្តិការណ៍សហគមន៍ ២០ កុម្ភៈ ព្រមទាំងប្រកាសបើកដំណើរប្រទេសឡើងវិញ។
ហើយថ្ងៃនេះ គឺជាថ្ងៃបើកទំព័រថ្មី នៃការចាប់ផ្តើមជីវិតសិក្សាដំបូងរបស់ក្មួយៗ ដែលទើបនឹងដល់អាយុត្រូវចូលសាលារៀន និងជាថ្ងៃចូលរៀន ក្នុងឆ្នាំសិក្សាថ្មីរបស់ក្មួយៗជាសិស្សានុសិស្ស ជាកុលបុត្រ កុលធីតាជាទីស្រឡាញ់ គ្រប់ៗគ្នានៅក្នុង " គន្លងប្រក្រតីភាពថ្មីនៃវិស័យអប់រំ" ។
ក្នុងនាមរដ្ឋបាលស្រុកមុខកំពូល លោកអភិបាលស្រុក បានឧបត្ថម្ភអំពូលភ្លឺសូឡាដល់វិទ្យាល័យ ជា ស៊ីម ព្រែកអញ្ចាញចំនួន១០០ដើម ដើម្បីដាក់បំភ្លឺក្នុងបរិវេណវិទ្យាល័យផងដែរ៕
.jpg)
