ដំណាំឪឡឹក និងត្រសក់ ធម្មជាតិឆ្នាំនេះមានទីផ្សារល្អ តែទិន្នផលមិនសូវបាន ដោយសារមិនសូវមានទឹកសន្សើមគ្រប់គ្រាន់
ខេត្តបន្ទាយមានជ័យ៖ប្រជាកសិករដាំដំណាំហូបផ្លែប្រភេទឪឡឹក និងត្រសក់ នៅក្នុងភូមិសាស្ត្រខេត្តបន្ទាមានជ័យជាប់ព្រំដែន ថៃ បានត្អូញត្អែអំពីការដាំដុះមិនសូវបានផលដោយសារកត្តាឆ្នាំនេះទឹកសន្សើមមិនសូវអំណោយឲ្យបានគ្រប់គ្រាន់ ពីព្រោះដំណាំទាំងនេះគឺពឹងផ្អែកទៅលើទឹកសន្សើមទាំងស្រុង ឯតម្លៃលក់ចេញនៅតាមទីផ្សារមិនពិបាកនោះទេ បើប្រៀបធៀបឆ្នាំទៅមិញប្រហាក់ប្រហែលគ្នា។
ប្រជាកសិករបានឲ្យដឹងថា ក្រៅពីដាំនិងប្រមូលផលដំឡូងមី ពួកគាត់មួយចំនួនងាកមកដាំដំណាំឪឡឹក និងត្រសក់ បន្ទាប់បន្សំដើម្បីផ្គត់ផ្គង់ក្នុងគ្រួសារបន្ថែម ដោយខ្លះដាំក្នុងមួយឆ្នាំ១ដង និងខ្លះទៀត២ដង ហើយការដាំដុះនោះទៀតសោធពឹងផ្អែកទៅលើទឹកសន្សើម ដោយសារឆ្នាំនេះទឹកសន្សើមផ្តល់មិនគ្រប់គ្រាន់ធ្វើឲ្យដាំណាំពួកគាត់មិនសូវបានផលល្អនោះទេ។
លោកស្រី សួន សៃហឿត ជាប្រជាកសិកនៅភូមិខ្វាវ ឃុំរលួស ស្រុកស្វាយចេកបានលើកឡើងថា ផ្លែឪឡឹកឆ្នាំនេះលក់ចេញក្នុង១តោនតម្លៃ៧០ម៉ឺនរៀល រីឯត្រសក់ទាំងខ្ជី និងទុំ ក្នុង១គីឡូក្រាមតម្លៃ២០០០រៀល បើប្រៀបធៀបឆ្នាំទៅមិញមិនជាងគ្នានោះទេ។
លោកស្រីបញ្ជាក់ថា ប្រជាកសិករយើងចាប់ផ្តើមដាំណាំឪឡឹក និងត្រសក់ក្នុងចន្លោះចាប់ពីខែ៥-៦រយះពេលត្រឹមតែ ២ខែ នឹងចាប់ផ្តើមប្រមូលផល ហើយការដាំដុះនោះមិនពិបាកនោះទេ ដោយប្រើតែជីធម្មជាតិដូចជា លាមកសត្វគោ ក្របីជាដើមតែប៉ុណ្ណោះ។
ពួកគាត់លើកឡើងទៀតថា ទោះបីជាការដាំដំណាំទាំងនេះមិនសូវបានផលតាមតម្រូវការក៏ពិតមែន ក៏ប៉ុន្តែវាអាចទប់ទល់ជីវភាពក្នុងគ្រួសារបាន ដោយមិនចាំបាច់ឆ្លងដែនទៅស្វែករកការងារធ្វើនៅក្រៅប្រទេស ដោយខុសច្បាប់ទាំងប្រថុយប្រថាននោះឡើយ៕
.jpg)
