ដំណាំអំពៅប្រភេទ(ខេ២១) ឆ្នាំនេះល្អជាងឆ្នាំទៅមិញ ឯទីផ្សារនាំចេញទៅប្រទេសថៃតម្លៃថេ
ខេត្តបន្ទាយមានជ័យ៖ប្រជាកសិករដាំដំណាំអំពៅប្រភេទ(ខេ២១) នាំចេញទៅកាន់ប្រទេសថៃ នៅតាមបន្ទាត់ព្រំដែន ក្នុងភូមិសាស្ត្រខេត្តបន្ទាយមានជ័យ បានសម្តែងការសប្បាយចិត្តដោយសារឆ្នាំនេះទិន្នផលបានល្អជាងឆ្នាំទៅមិញ ឯទីផ្សារនាំចេញទៅប្រទេសថៃតម្លៃមិនជាងឆ្នាំទៅមិញ។
បើតាមលោក ម៉ាប់ ជាប្រជាពលរដ្ឋរស់នៅក្នុងភូមិសិលាខ្មែរ ឃុំអូរបីជាន់ ស្រុកអូរជ្រៅ បានលើកឡើងថា ប្រជាកសិករដែលដាំអំពៅឆ្នាំនេះសប្បាយចិត្តក្នុងការប្រមូលផល ដោយសារអំពៅឆ្នាំនេះបានផលល្អជាឆ្នាំទៅមិញ ដោយកត្តាទឹកភ្លៀងបានធ្លាក់អំណោយផលល្អ ឯតម្លៃវិញបើប្រៀបធៀបនឹងឆ្នាំទៅមិញមិនជាងគ្នានោះទេ ពោលគឺថេ ដោយឈ្មួញថៃចូលមកទិញដល់ចំការក្នុង១តោន តម្លៃ១,០០០បាត(ប្រាក់ថៃ) ស្មើនឹងជាង១២ម៉ឺនរៀល ហើយម្យ៉ាងវិញទៀតអំពៅប្រភេទ(ខេ២១)នេះមានរស់ជាតិផ្អែមល្អនិងពេញនិយមសំរាប់ទីផ្សារនាំចេញ ចូលរោងចក្រផលិតជាស្ករស ក្នុងប្រទេសថៃ។
លោកបញ្ជាក់ថា ទំហំដីក្នុង១រ៉ៃប្រជាកសិករអាចប្រមូលផលបានចាប់ពី២៨ ទៅ៣០តោន ដាំម្តងអាចប្រមូលផលបាន៣ទៅ៤លើក ដោយប្រើរយៈពេល៩ខែប្រមូលផលម្តង អំពៅមានប្រវែង២ទៅ២.៥ម៉ែត្រ ដោយគ្រាន់តែដាក់ជី ភ្ជួរដីលុបគល់ និងបាញ់ថ្នាំសំរាប់ស្មៅ ឬសត្វល្អិតតែប៉ុណ្ណោះ។ក្នុងនោះលោកបានលើកឡើងពីបទពិសោធន៍ក្នុងការដាំអំពៅរយៈពេលជាច្រើនឆ្នាំមកនេះឃើញថា អំពៅដើមកាន់តែចំណាស់បន្តិចកាន់តែផ្អែម ហើយតម្លៃក៏កាន់តែថ្លៃផងដែរ។
ទន្ទឹមនោះដែរលោកក៏បានអំពាវនាវដល់ប្រជាពលរដ្ឋ ដែលមានបំណងចង់ឆ្លងដែរទៅធ្វើការងារដោយខុសច្បាប់នៅក្រៅប្រទេស គួរនាំគ្នាងាកមកធ្វើការងារប្រកបរបរនៅស្រុកយើងក៏បានដូចគ្នាតម្លៃពលកម្មបើបងប្អូនខំធ្វើនោះនឹងបានកម្រៃច្រើន មិនចាំបាច់ចំណាក់ស្រុកដោយប្រថុយប្រថាន ដោយខ្លះគេជិះជាន់កម្លាំងពលកម្មជាដើមនោះទេ។
ដោយឡែកលោក ដា រ៉ុង ដែលជាកម្មស៊ីឈ្នួលកាប់អំពៅនិងជាកម្មកសំណង់ផងនោះក៏បានលើឡើងដែរស្រដៀងនឹងលោកម៉ាប់ដែរថា តម្លៃកម្លាំងពលកម្មនៅស្រុកយើង បើប្រៀបធៀបទៅនឹងស្រុកថៃមិនជាងគ្នាប៉ុន្មាននោះទេ ដូច្នេះគួរនាំគ្នាប្រកបរបរនិងធ្វើការនៅស្រុកយើងវាប្រសើជាង ឆ្លងដែនដោយប្រថុយប្រថាន គេជិះជាន់កម្លាំងពលកម្ម ហើយម្យ៉ាងវិញទៀតរស់នៅដោយជួបជុំគ្រួសារទៀងផង៕