លោកជំទាវ ឧកញ៉ា ហេមតិត្តា អគ្គមហាឧបាសិកា ពុទ្ធសាសនូបត្ថម ម៉ៅម៉ាល័យ កែគឹមយ៉ាន អញ្ជើញជាអធិបតីក្នុងពិធីបញ្ចុះបឋមសិលា សាងសង់ស្ពានឆ្លងស្ទឹង នៅស្រុកព្រះនេត្រព្រះ
ខេត្តបន្ទាយមានជ័យ៖ស្ពានយោលចំណាស់១ខ្សែ ឆ្លងកាត់ដងស្ទឹងតាប៉ុន សៀមរាបភ្ជាប់មកខេត្តបន្ទាយមានជ័យ ត្រង់វត្តអម្ពិលពោធិប្រាក់ ឃុំប្រាសាទ ស្រុកព្រះនេត្រព្រះ នាព្រឹកថ្ងៃទី៩ ខែមករា ឆ្នាំ២០២២ ត្រូវបានធ្វើពិធីក្រុងពលីបញ្ចុះបឋមសិលាសាងសង់ ស្ពានឆ្លងស្ទឹង១ខ្សែនេះ ទៅជាស្ពានថ្មបេតុងវិញ ដើម្បីផ្សារភ្ជាប់រវាងប្រជាជនខេត្តបន្ទាយមានជ័យ និងប្រជាជនខេត្តសៀមរាប បានឆ្លងកាត់ទៅវិញទៅមក។
ដែលស្ពាននេះមានប្រវែងបណ្ដោយ ៥៥ ម៉ែត្រនិងទទឹង ៥.៣ ម៉ែត្រ គ្រោងចំណាយថវិកាចំនួន ១៥,៥០០០ដុល្លារ ដោយពិធីនេះប្រព្រឹត្តទៅក្រោមអធិបតីភាព លោកជំទាវ ឧកញ៉ា ហេមតិត្តា អគ្គមហាឧបាសិកា ពុទ្ធសាសនូបត្ថម ម៉ៅម៉ាល័យ កែគឹមយ៉ាន ដែលជាអ្នកចូលរួមឧបត្ថម្ភធំកសាង ស្ពាននេះឱ្យបានល្អស្អាតរឹងមាំមានគុណភាព ប្រើប្រាស់បានយូរអង្វែង ដោយស្ពាននេះមានសារៈសំខាន់ណាស់ជាសម្បត្តិរួម បានបុណ្យទាំងយប់ទាំងថ្ងៃ។
គម្រោងសាងសង់ស្ពាន ដែលមានប្រវែង ៥៥ ម៉ែត្រទទឹង ៥.៣ ម៉ែត្រនេះស្ថិតនៅចំណុច វត្តអម្ពិលពោធិប្រាក់ ភូមិអំពិល ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ តភ្ជាប់ភូមិអំពិល ឃុំសំបួរខេត្តសៀមរាប ហើយគម្រោងនេះ ប្រើប្រាស់ថវិកាសទ្ធាជ្រេះថ្លារបស់ពុទ្ធបរិស័ទ សប្បុរសជនជិតឆ្ងាយ (ក្នុងនិងក្រៅប្រទេស) ដែរស្ពាននេះដឹកនាំកសាងដោយព្រះភិក្ខុ បញ្ញាធរោ លន់ គឹមសាន ព្រះគ្រូចៅអធិការវត្ត អម្ពិលពោធិប្រាក់។
លោក ឃូ ពៅ អភិបាលស្រុកព្រះនេត្រព្រះបានមានប្រសាសន៍លើកឡើងថា ការកសាងស្ពាន១ខ្សែនេះឡើង គឺដើម្បីចូលរួមអភិវឌ្ឍក្នុងសហគមន៍មូលដ្ឋាន ឱ្យប្រជាពលរដ្ឋមានភាពងាយស្រួល ធ្វើដំណើរឆ្លងកាត់ជាពិសេសសិស្សានុសិស្សឆ្លងកាត់ទៅវិញទៅមក ដើម្បីរៀនសូត្រប្រកបរបររកស៊ី ដែលកន្លងមកពួកគាត់មានការលំបាកព្រោះថាជាស្ពានយោលមានទំហំតូច អាចឆ្លងបានត្រឹមថ្មើជើង ជិះកង់ម៉ូតូតែប៉ុណ្ណោះ។
ក្នុងនាមអាជ្ញាធរមូលដ្ឋានក៏បានមានប្រសាសន៍ កោតសរសើរនិងអំណរអរគុណចំពោះ ឯកឧត្តម លោកជំទាវ លោកឧកញ៉ា សប្បុរសជនទាំងអស់ដែលមានសទ្ធាជ្រះថ្លា មកចូលរួមកសាងនៅស្ពានឆ្លងស្ទឹងមួយនេះ ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋបានឆ្លងកាត់ និងក៏សូមអំពាវនាវដល់ឯកឧត្តម លោកជំទាវ សប្បុរសជនជិតឆ្ងាយក្ដី ជួយឧបត្ថម្ភជាសម្ភារៈថវិកា ដើម្បីឲ្យស្ពានមួយនេះ បានឆាប់រួចរាល់៕