ភូមិចំនួន២ ក្នុងសង្កាត់ផ្សារកណ្តាល ត្រូវបានបិតខ្ទប់ការធ្វើដំណើរចេញ-ចូល ជាបណ្តោះអាសន្ន ដើម្បីការពារ និងទប់ស្កាត់កុំឲ្យមានការ ឆ្លងរីករាលដាល នៃជំងឺកូវីដ១៩ ទៅកាន់តំបន់ផ្សេងទៀត
ខេត្តបន្ទាយមានជ័យ៖ភូមិចំនួន២ ក្នុងសង្កាត់ផ្សារកណ្តាល ក្រុងប៉ោយប៉ែត ត្រូវបានបិតខ្ទប់ការធ្វើដំណើរចេញ-ចូល ជាបណ្តោះអាសន្ន បន្ថែមទៀត ខណៈដែលនៅក្នុងភូមិសាស្ត្រសង្កាត់ប៉ោយប៉ែតនូវមិនទាន់បញ្ចប់នៃការបិតខ្ទប់នៅឡើយ ដើម្បីការពារ និងទប់ស្កាត់កុំឲ្យមានការ ឆ្លងរីករាលដាល នៃជំងឺកូវីដ១៩ ទៅកាន់តំបន់ផ្សេងទៀត។
បើតាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ លេខ ១២៥ /២១ ស.ស.រ សម្រេចបិតខ្ទប់ការធ្វើដំណើរចេញ-ចូល ជាបណ្តោះអាសន្នលើទីតាំងក្នុងភូមិសាស្ត្រភូមិប្រជាធម្មលិច មួយផ្នែក នៃបណ្ឌល ៤ និងភូមិប្រជាធម្មកើតមានពីមណ្ឌល គឺមណ្ឌល ៧ និងមណ្ឌល ៩ នៃសង្កាត់ផ្សារកណ្តាល ក្រុងប៉ោយប៉ែត។
សេចក្តីសម្រេចនេះបញ្ជាក់ថា ការបិតខ្ទប់ទាំង២ភូមិខាងលើនេះរយះពេល១៤ថ្ងៃ ដោយគិតចាប់ពីវេលាម៉ោងសូន្យ នៃថ្ងៃទី០៦ ខែឧសភា ឆ្នាំ២០២១ រហូតដល់ថ្ងៃទី១៨ ខែឧសភា ក្នុងគោលបំណងធានាដល់ប្រសិទ្ធភាព នៃការគ្រប់គ្រងការឆ្លងរីករាលដាលនៃជំងឺកូវីដ១៩ ក្នុងព្រឹត្តការណ៍សហគមន៍ ២០ កុម្ភៈនៅក្នុងភូមិសាស្ត្រដែលត្រូវបិតខ្ទប់ និងទប់ស្កាត់ជំងឺនេះ មិនឲ្យឆ្លងទៅកាន់តំបន់ផ្សេងទៀត។
ក្នុងសេចក្តីសម្រេចនោះបញ្ជាក់ទៀតថា ក្នុងអំឡុងពេលអនុវត្តវិធានការបិតខ្ទប់នេះ បុគ្គលគ្រប់រូបត្រូវហាមឃាត់ការធ្វើដំណើរចេញពីលំនៅឋានឬទីសំណាក់បច្ចុប្បន្ន លើកលែងតែករណីចាំបាច់ដូចជា ការដឹកជញ្ជូនទំនិញគ្រប់ប្រភេទ ការធ្វើដំណើរទៅមន្ទីរពេទ្យ មណ្ឌលសុខភាព សម្ភព ទីកន្លែងព្យាបាល ឬឱសថស្ថាន ដោយមូលហេតុសុខភាព តែនៅក្នុងរង្វង់ភូមិសាស្ត្របិតខ្ទប់តែប៉ុណ្ណោះ និងការធ្វើដំណើររបស់បុគ្គលិកក្រុមគ្រូពេទ្យទាំងផ្នែករដ្ឋ និងឯកជន មន្ត្រីរាជការ និងកងកម្លាំងប្រដាប់អាវុធ ការធ្វើដំណើររបស់ក្រុមពន្លត់អគ្គីភ័យ ការដឹកកម្មករទៅកន្លែងការងារនៅតាមរោងចក្រ សហគ្រាសជាដើម។រាល់ការធ្វើដំណើរដែលត្រូវបានអនុញ្ញាតខាងលើ មិនត្រូវធ្វើឡើងនៅចន្លោះពីម៉ោង២០(ម្ភៃ) ដល់ម៉ោង ៥ ព្រឹក ឡើយលើកលែងតែចំពោះការធ្វើដំណើរ ដោយមូលហេតុសុខភាពបន្ទាន់ការដឹកជញ្ជូនទំនិញបំពេញកាតព្វកិច្ចដែលបំរើផលប្រយោជន៍សាធារណៈ ការធ្វើដំណើរទៅកន្លែងបំពេញការងារនៅក្នុងសហគ្រាស គ្រឹះស្ថានឬទីតាំងអាជីវកម្ម និងករណីចាំបាច់ដទៃទៀតដោយមានការអនុញ្ញាតពីអាជ្ញាធរមានសមត្ថកិច្ច៕
