រដ្ឋបាលខេត្តបន្ទាយមានជ័យ ចុះរៀបចំផ្សារសិរីសោភ័ណ ឲ្យមានររៀបរាបរយនិងមានលក្ខណៈស្តង់ដារសុវត្ថិភាព ដើម្បីទប់ស្កាត់ការរីរាលដាលជំងឺកូវីដ១៩
ខេត្តបន្ទាយមានជ័យ៖ដើម្បីបង្ការការ និងទប់ស្កាត់ការរីរាលដាលជំងឺកូវីដ១៩ នៅព្រឹក ថ្ងៃទី៧ ខែឧសភា ឆ្នាំ២០២១ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានដឹកនាំកម្លាំងចម្រុះចុះរៀបចំផ្សារសិរីសោភ័ណឲ្យមានរបៀបរាបរយ តាមស្តង់ដារសុវត្ថិភាព ឲ្យអាជីវករលក់ដូរកំលាតពីគ្នាពីតូប១ ទៅតូប១ចំនួន២ម៉ែត្រ។
ក្នុងការរៀបចំនោះដែរឯកឧត្តមអភិបាលខេត្ត បានមានប្រសាសន៍ថា វិធានការរៀបចំផ្សារសិរីសោភ័ណនាពេលនេះ ដើម្បីឲ្យមានសុវត្ថិភាព មានលក្ខណៈស្តង់ដារ ដើម្បីធានាបាននូវសណ្តាប់ធ្នាប់សាធារណៈ សុវត្ថិភាពសង្គម ពិសេសសុខភាពសាធារណៈ ដើម្បីចូលរួមបង្ការ និងទប់ស្កាត់ការឆ្លងរីករាលដាលជំងឺកូវីដ-១៩ ព្រោះកន្លងមកមានប្រុសម្នាក់កើតជំងឺកូវីដ១៩ ហើយម្តាយមុខរបលក់ដូរក្នុងផ្សារ ដើម្បីជៀសវាងក្នុងការបិទផ្សារ។
ជាមួយគ្នានោះដែរឯកឧត្តមអភិបាលខេត្ត បានបញ្ជាក់ទៅកាន់ប្រជាពលរដ្ឋ ជាជីវករថា បើមានករណីសង្ស័យដែលមានការពាក់ព័ន្ធជាមួយជំងឺកូវីដ-១៩ ត្រូវរាយការណ៍បន្ទាន់ទៅអាជ្ញាធរមានសមត្ថកិច្ចភ្លាមៗ ក្នុងនោះឯកឧត្តមបានព្រមានបិទអាជីវកម្ម ឬដាក់ទោសទណ្ឌទៅលើអាជីវកររូបណាដែលមិនបានអនុវត្តខ្ជាប់ខ្ជួនតាមការណែនាំរបស់ក្រសួងសុខាភិបាល និងប្រមុខរាជរដ្ឋាភិបាលគឺ ៣កុំ និង៣ការពារ ។
ទន្ទឹមនោះឯកឧត្តមបានអំពាវនាវដល់បងប្អូនប្រជាពលរដ្ឋ ក្នុងខេត្តមកទិញទំនិញ បន្លែផ្លែឈើ ត្រីសាច់ គ្រប់ប្រភេទនៅក្នុងផ្សារប្រកបដោយអនាម័យ និងសុវត្ថិភាពខ្ពស់ តាមស្តង់ដារបច្ចេកទេសនិងជៀសផុតពីការឆ្លងរីករាលដាលនៃជំងឺកូវីដ-១៩ផងដែរ៕