រន្ទះបាញ់ផ្តាច់ជីវិតស្ត្រីម្នាក់ សត្វគោ១ក្បាល និងមនុស្សរបួស ធ្ងន់ ស្រាល៤នាក់ផ្សេងទៀត ២ករណីផ្សេងពីគ្នា
ខេត្តបន្ទាយមានជ័យ៖ស្រ្តីម្នាក់បានស្លាប់ និងសត្វគោ១ក្បាលផងដែរ រួមនឹងមនុស្ស៤នាក់របួសធ្ងន់ស្រាល ដោយសារឧបទ្ទវហេតុរន្ទះបាញ់នៅស្រុកភ្នំស្រុក ខេត្តបន្ទាយមានជ័យ ដោយហេតុការណ៍នេះបានកើតឡើង២ករណីដោយឡែកពីគ្នា នៅឃុំណាំតៅ ស្រុកភ្នំស្រុក ខេត្តបន្ទាយមានជ័យ។
លោកវរសេនីយ៍ឯក យ៉ត សុផល អធិការនគរបាលស្រុកភ្នំស្រុក បានឲ្យដឹងថា ករណីទី០១ នៅវេលាម៉ោង២និង១៥នាទីរសៀលថ្ងៃទី១៤ខែឧសភា ឆ្នាំ២០២១ មានភ្លៀងធ្លាក់១មេយ៉ាងធំ លាឡំនិងផ្គររន្ទះយ៉ាងខ្លាំង នៅវាលថ្មពិលចម្ងាយប្រហែល៥ គ.ម ខាងលិចភូមិក្នាំង ឃុំណាំតៅ ស្រុកភ្នំស្រុក ខេត្តបន្ទាយមានជ័យ ស្របពេលគ្នានោះមានប្រជាពលរដ្ឋ ចំនួន៥នាក់ បានទៅភ្ជួរស្រែនិងព្រួសស្រូវដោយឃើញសភាពមេឃមានដុំពពកខ្មៅ និងមានភ្លៀងធ្លាក់ យ៉ាងខ្លាំង ប្រជាពលរដ្ឋដែលទៅភ្ជួរ និងព្រួសស្រូវទាំងនោះ បាននាំគ្នាទទូសំពត់ភ្លៀងការពារកំឲ្យទឹកភ្លៀងធ្លាក់ត្រូវខ្លួន នៅក្បែរគោយន្តកន្ត្រៃដែលបើកទៅធ្វើស្រែ រំពេចនោះស្រាប់តែមានរន្ទះបានបាញ់មកចំស្រ្តីម្នាក់ បណ្តាលឲ្យស្លាប់ស្រ្តីម្នាក់ និង៤នាក់ទៀតរងរបួសធ្ងន់ និងស្រាល ត្រូវបានគេជួយដឹកបញ្ជូនមកសង្រ្គោះនៅមន្ទីរពេទ្យបង្អែក ស្រុកភ្នំស្រុកភ្លាមៗផងដែរ ។
លោកអធិការស្រុកភ្នំស្រុក បានបញ្ជាក់ថា ស្ត្រីដែលស្លាប់ដោយសារន្ទះបាញ់នោះមានឈ្មោះ សា លន ភេទស្រី អាយុ២៥ឆ្នាំ ហើយអ្នករងរបួស ក្នុងហេតុការណ៍រន្ទះបាញ់នេះមានចំនួន៤នាក់ រួមមាន៖
១-ឈ្មោះ ម៉ាន មាស់ ភេទប្រុស អាយុ៣១ឆ្នាំ របួសធ្ងន់បញ្ជូនទៅមន្ទីពេទ្យ
២-ឈ្មោះ លឿន រតនៈ ភេទប្រុស អាយុ៣១ឆ្នាំ របួសជើងខាងឆ្វេងស្រាល
៣-ឈ្មោះ ឌួង វណ្ណា ភេទប្រុស អាយុ១៣ឆ្នាំ របួសធ្ងន់ត្រូវ បានបញ្ជូនទៅមន្ទីពេទ្យ
៤-ឈ្មោះ បូស សៀវឡី ភេទស្រី អាយុ៣ឆ្នាំ របួសស្រាល ទាំងអស់រស់នៅភូមិក្នាំង ឃុំណាំតៅ ស្រុកភ្នំស្រុក ខេត្តបន្ទាយមានជ័យ។
ដោយឡែកករណី២ លោកអធិការស្រុកភ្នំស្រុក បានបញ្ជាក់ទៀតថា នៅវេលាម៉ោង២និង១៥នាទីរសៀលថ្ងៃទី១៤ ខែឧសភា ឆ្នាំ២០២១នេះដដែរ មានភ្លៀងផ្គររន្ទះបាញ់ខ្លាំង នៅត្រពាំងស្មាច់ ខាងលិចភូមិតាគង់ ឃុំណាំតៅ ប្រហែល១គីឡូ ត្រូវបានរន្ទះបាញ់ចំសត្វគោ១ក្បាលកំពុងស៊ីស្មៅ បណ្តាលឲ្យងាប់។ម្ចាស់សត្វគោវិញមានឈ្មោះ ជិម សាឃឿត ភេទប្រុស អាយុ៤៧ឆ្នាំ រស់នៅភូមិតាគង់ ឃុំណាំតៅ ស្រុកភ្នំស្រុក ខេត្តបន្ទាយមានជ័យ៕
.jpg)
