ឃាត់ខ្លួនជនសង្ស័យ ២នាក់ ករណីឆក់ខ្សែ ក ចំនួន៥ដំឡឹង ពីបុរសម្នាក់បានសម្រេច
រាជធានីភ្នំពេញ៖ជនសង្ស័យ២នាក់ ត្រូវបានកម្លាំងនគរបាលប៉ុស្តិ៍បឹងព្រលឹត ចាប់ឃាត់ខ្លួនកាលពី ថ្ងៃទី១៤ ខែឧសភា ឆ្នាំ២០២១ នៅតាមបណ្ដោយផ្លូវលេខ១១១ សង្កាត់បឹងព្រលឹត ខណ្ឌ៧មករា រាជធានីភ្នំពេញ បន្ទាប់ពីធ្វើសកម្មភាពឆក់ខ្សែរក ពីបុរសម្នាក់ ខណៈកំពុងដើរបម្រុងចូលរថយន្ត។
បើតាមប្រភពពីអ្នកឃើញហេតុការណ៍នៅកន្លែងកើតហេតុបានឲ្យដឹងថា នៅមុនពេលកើតមានប្ដីប្រពន្ធ២នាក់ បានជិះរថយន្តពីផ្ទះមកទិញម្ហូបនៅតាមបណ្ដោយផ្លូវ១១១ ខណៈទិញរួច ដើរបម្រុងចូលរថយន្តវិញ ក៏ស្រាប់តែលេចមុខជនសង្ស័យម្នាក់ជិះម៉ូតូម៉ាកស្មាស ពណ៌ខ្មៅ គ្មានស្លាកលេខ ធ្វើសកម្មភាព ឆក់ខ្សែរក ពីបុរសជាប្ដី១ខ្សែចំនួន៥តំឡឹងបានសម្រេច ភ្លាមៗបុរសជាប្ដីបានទាញម៉ូតូជនសង្ស័យដួស ហើយជនសង្ស័យបានរត់ចោលម៉ូតូ ទៅឡើងជិះជាជាមួយបក្សពួកម្នាក់ជិះម៉ូតូម៉ាកscoopy ពណ៌ស ពាក់ស្លាកលេខ ភ្នំពេញ 1IR-8476 ក៏ត្រូវបានប្រជាពលរដ្ឋ និងសមត្ថកិច្ចមូលដ្ឋានប៉ុស្តិ៍ ជួយឃាត់បានទាំង២នាក់តែម្ដង។
ក្រោយពីឃាត់ខ្លួនជនសង្ស័យ ត្រូវបាននគរបាលនាំខ្លួនទៅសួនាំនៅប៉ុស្តិ៍នគរបាលបឹងព្រលឹត ។ ចំណែកខ្សែក របស់ជនរងគ្រោះត្រូវបាននគរបាលប្រគល់ជូនរងគ្រោះវិញ៕