បុរសម្នាក់បើកគោយន្តកន្ត្រៃ បាក់សាក់ស៊ីកៀបខ្ទប់ទៅនឹងដែកទទឹងដៃចង្កូតគោយន្ត បណ្តាលឲ្យការ៉ុងស្រូវសង្កត់ពីលើស្លាប់ភ្លាមៗ
ខេត្តបន្ទាយមានជ័យ៖បុរសម្នាក់ត្រូវការ៉ុងស្រូវសង្កត់ពីលើស្លាប់មួយរំពិច ក្រោយពីបើកគោយន្តកន្ត្រៃដឹកស្រូវធ្ងន់ពេក បណ្តាលឲ្យបាក់សាក់ស៊ីកៀបខ្ទប់ទៅនឹងដែកទទឹងដៃចង្កូតគោយន្ត។
ហេតុការណ៍បានកើតឡើង កាលពីវេលាម៉ោង៤និង២០នាទីល្ងាច ថ្ងៃទី៦ ខែមេសា ឆ្នាំ២០២១ នៅចំណុចអូតាតោ ស្ថិតក្នុងភូមិសាស្ត្រភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។
នគរបាលរដ្ឋបាលឃុំភ្នំលៀបបានឲ្យដឹងថា ជនរងគ្រោះមានឈ្មោះ សែម មុំ អាយុ៤៨ឆ្នាំ ភេទប្រុស នៅភូមិក្បាលក្របី ឃុំសំបួរ ស្រុកមង្គលបូរី ខេត្តបន្ទាយមានជ័យ។
នគរបាលរដ្ឋបាលបានបញ្ជាក់ឲ្យដឹងទៀតថា មុនពេលកើតហេតុ ជនរងគ្រោះបានស៊ីឈ្នួលដឹកស្រូវឲ្យគេ បន្ទាប់ពីច្រូតកាត់បោកបែនរួចមានគោយន្តជាច្រើនគ្រឿងបើកគម្លាតពីប្រហែលជា១០០ម៉ែត្រជនរងគ្រោះ បើកនៅកណ្តាលគេ ពេលបើកមកចំណុចកើតហេតុ រ៉ឺម៉កគោយន្តកន្ត្រៃបាក់សាក់ស៊ី បណ្តាលឲ្យការុងស្រូវរអិលមកមុខខ្ទប់កៀបអ្នកបើកទៅនឹងដែកទទឹងដៃចង្កូត ត្រូវត្រង់ដើមទ្រូងស្លាប់ភ្លាមៗ។
ហេតុដែលបង្កឲ្យគ្រោះថ្នាក់នេះ សង្ស័យដែកសាក់ស៊ីរ៉ឺម៉កគោយន្តមានសភាពចាស់ នៅពេលដឹកស្រូវធ្ងន់បានបាក់ហើយការុងស្រូវរអិលសង្កត់អ្នកបើកកៀបខ្ទប់ នឹងដែកទទឹងដៃចង្កូតគោយន្តស្លាប់តែម្តង ។ សពជនរងគ្រោះត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
