ពិធីចែកមួកសុវត្ថិភាពដល់សិស្សានុសិស្ស និងលោកគ្រូអ្នកគ្រូ សរុបចំនួន៨៨៩មួក នៅសាលាបឋមសិក្សាអូរអំបិល
ខេត្តបន្ទាយមានជ័យ៖លោកជំទាវ មឹន មាណវី រដ្ឋលេខាធិការក្រសួងសាធារណៈនិងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន (គ.ស.ច.គ) លោក លី សារី អភិបាលរងខេត្តតំណាងឱ្យឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញចូលរួមជាអធិបតីភាពក្នុងពិធីចែកមួកសុវត្ថិភាពដល់សិស្សានុសិស្ស និងលោកគ្រូ អ្នកគ្រូ សរុបចំនួន៨៨៩មួក នៅសាលាបឋមសិក្សាអូរអំបិល ក្នុងគោលបំណង(ជំរុញការពាក់មួកសុវត្ថិភាពជាពិសេសក្នុងចំណោមអ្នករួមដំណើរតាមទោចចក្រយានយន្តនៅកម្ពុជា) រៀបចំដោយអង្គការមូលនិធិបង្ការរបួសអាស៊ី AIP សហការជាមួយក្រុមហ៊ុនមេនូឡាយ ខេមបូឌា (Manulife Cambodia) ដោយមានការអញ្ជើញចូលរួមពីលោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំព្រះរាជាណាចក្រកម្ពុជា និងលោក Justin Helferich អគ្គនាយកប្រតិបត្តិ និងជានាយកចាត់ការទូរទៅក្រុមហ៊ុនមេនូឡាយ ខេមបូឌា (Manulife Cambodia និងលោក លោកស្រី មន្ទីរអង្គភាព ស្ថាប័នពាក់ព័ន្ធ នារសៀល២៥ ខែវិច្ឆិកា ឆ្នាំ២០២១។
លោក លី សារី បានមានប្រសាសន៍លើកឡើងថា៖ បើប្រៀបធៀបស្ថានភាពគ្រោះថ្នាក់ចរាចរណ៍ផ្លូវគោករយៈពេល៩ខែដើមឆ្នាំ២០២១ ទៅនឹងរយៈពេលដូចគ្នាក្នុងឆ្នាំ២០២០ នៅក្នុងខេត្តបន្ទាយមានជ័យ ដោយយោងតាមរបាយការណ៍ របស់លេខាធិការដ្ឋានអនុគណៈកម្មាការសុវត្ថិភាពចរាចរណ៍ផ្លូវគោកខេត្តរួមមាន៖
១.គ្រោះថ្នាក់បានកើតឡើង៦៣ករណីលើ៦២ករណីកើតឡើង១ករណី
២.គ្រោះថ្នាក់ប្រភេទធ្ងន់បានកើតមានឡើង៦២ករណីលើ ៥៨ករណីកើនឡើង៤ករណី។
៣.គ្រោះថ្នាក់ប្រភេទសាលបានកើតមានឡើង១ករណីលើ ៤ករណីថយចុះ៣ករណី។
៤.ស្លាប់ចំនួន៤៨នាក់ស្រី៦អ្នក លើ៥៣នាក់ ស្រី១០នាក់ថយចុះ៥នាក់។
៥.របួសធ្ងន់ចំនួន៣៨នាក់ លើ៥៣នាក់ ស្រី១៨នាក់ ថយចុះ១៥នាក់។
៦.របួសស្រាលចំនួន២០នាក់ ស្រី៧នាក់ លើ៣៨នាក់ ស្រី ១២នាក់ ថយចុះ១៨នាក់។
ជាមួយគ្នានោះលោក បានសង្ឃឹមថា៖ គម្រោងមួកសុវត្ថិភាពសម្រាប់ក្រុមគ្រួសារពិតជាបានរួមចំណែកយ៉ាងសំខាន់ ក្នុងការបង្ការទប់ស្កាត់ការស្លាប់ ដោយសារបញ្ហាគ្រោះថ្នាក់ចរាចរណ៍ ហើយគម្រោងនេះនឹងនាំមកនូវសុវត្ថិភាពល្អប្រសើរសម្រាប់សហគមន៍របស់យើងផងដែរ។
មានប្រសាសន៍ថ្លែងក្នុងឱកាសនោះលោកជំទាវ មឹន មាណវី បានធ្វើការកោតសរសើរ និងថ្លែងអំណរគុណយ៉ាងជ្រាលជ្រៅចំពោះអង្គការមូលនិធិបង្ការរបួសអាស៊ី AIP និងក្រុមហ៊ុនមេនូឡាយ ខេមបូឌា (Manulife Cambodia)ដែលបានសហការ និងជួយឧបត្ថម្ភទាំងកម្លាំងកាយ និងថវិកាក្នុងការអប់រំអំពីសុវត្ថិភាពចរាចរណ៍ពិសេសការផ្ដល់មួកសុវត្ថិភាពនាពេលនេះ។ម្យ៉ាងវិញទៀតសកម្មភាពនេះបង្ហាញឲ្យឃើញនូវការយកចិត្តទុកដាក់អំពីបញ្ហាសុវត្ថិភាពរបស់ប្រជាពលរដ្ឋយើង ជាក់ស្ដែងនៅក្នុងខេត្តបន្ទាយមានជ័យនាពេលនេះ។
ជាមួយគ្នានោះលោកជំទាវ បានធ្វើការអំពាវនាវដល់លោកគ្រូ អ្នកគ្រូ មាតា បិតា ត្រូវជួយអប់រំសិស្សានុសិស្សនិងកូនៗបន្ថែមទៀត អំពីសុវត្ថិភាពក្នុងការធ្វើដំណើរជាពិសេសសូមក្មួយក្មួយសិស្សានុសិស្សពេលធ្វើដំណើរពីកន្លែងមួយទៅកន្លែងមួយទៀតត្រូវមានស្មារតីប្រុងប្រយ័ត្នខ្ពស់ និងគោរពច្បាប់ចរាចរណ៍ឲ្យបានត្រឹមត្រូវព្រមទាំងចេះការពារខ្លួនពីការឆ្លងនីជំងឺកូវីដ.១៩ ដោយអនុវត្តឲ្យបានខ្ជាប់ខ្ជួនវិធានការ ៣ការពារ និង៣កុំ៕