អាជ្ញាធរកម្ពុជា ប្រគល់ជនជាតិថៃប្រុសស្រីចំនួន១០៣នាក់ ឲ្យអាជ្ញាធរថៃនៅលើស្ពានមិត្តភាពកម្ពុជា-ថៃ នៃច្រកទ្វារអន្តរជាតិប៉ោយប៉ែត(ខ្លងលឹក)
ខេត្តបន្ទាយមានជ័យ៖នៅរសៀលថ្ងៃទី២៤ ខែវិច្ឆិកា ឆ្នាំ២០២១ អាជ្ញាធរកម្ពុជាដឹកនាំដោយលោកឧត្តមសេនីយ៍ទោ ជា អេងយ៉ុង ស្នងការ ស្នងការដ្ឋានបច្ចេកទេស សន្តិសុខ នៃកងរាជអាវុធហត្ថលើផ្ទៃប្រទេស និងលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ រួមនឹងកម្លាំងនគរបាលអន្តោប្រវេសន៍ផងដែរ បានបញ្ជូនជនជាតិថៃចំនួន១០៣នាក់ ក្នុងនោះមានអ្នកផ្ទុកជំងឺកូវីដ១៩ ចំនួន៣៤នាក់ ស្រី១២នាក់ ប្រគល់ទៅឱ្យខាងសមត្ថកិច្ចថៃ តាមច្រកទ្វារអន្តរជាតិប៉ោយប៉ែត(ខ្លងលឹក)។
ជនជាតិថៃទាំង១០៣នាក់នេះ ត្រូវសមត្ថកិច្ចកម្ពុជាដឹកតាមរថយន្តយោធាយកទៅដាក់នៅចំណុចកាស៊ីណូ ស្ថិតក្នុងភូមិសាមគ្គីមានជ័យ សង្កាត់/ក្រុងប៉ោយប៉ែត ខេត្តបន្ទាយមានជ័យ ដើម្បីសម្រាកទទួលទានអាហារ លុះដល់រសៀលថ្ងៃខែខាងលើទើបបានដឹកបញ្ជូន ប្រគល់ឲ្យភាគីថៃនៅលើស្ពានមិត្តភាពកម្ពុជា-ថៃ នៃច្រកទ្វារព្រំដែនអន្តរជាតិប៉ោយប៉ែត(ខ្លងលឹក)។
ពាក់ព័ន្ធករណីនេះអ្នកនាំពាក្យអាវុធហត្ថលើផ្ទៃប្រទេស មិនប្រាប់ពីទីតាំងជនជាតិថៃទាំងនេះ នាំមក ពីណានិងជាប់ពាក់ព័ន្ធអ្វីខ្លះនោះទេ ដើម្បីរក្សាការទំនាក់ទំនង និងកិច្ចសហប្រតិបត្តិការល្អជាមួយខាងភាគីថៃតទៅថ្ងៃមុខទៀត ហើយការប្រគល់នេះគឺតបតាមការស្នើសុំរបស់ខាងភាគីថៃតែប៉ុណ្ណោះ។តែទោះយ៉ាងនេះក្តីប្រភពបញ្ជាក់ថា ជនជាតិថៃទាំងនេះ គឺមួយចំនួនត្រូវបានបញ្ជូនមកពីខេត្តពោធិ៍សាត់ ក្រុងព្រះសីហនុ និងមួយចំនួនសង្ស័យអាចមានពាក់ព័ន្ធករណី ចាប់បង្ខាំងជម្រិតទារប្រាក់ ខណៈពួកគេមកធ្វើការនៅកម្ពុជាដោយខុសច្បាប់ ប៉ុន្តែត្រូវបានសមត្ថកិច្ចកម្ពុជាធ្វើការសង្គ្រោះបានទាន់។
ទន្ទឹមនោះដែរអាជ្ញាធរថៃ បានថ្លែងអគុណដល់អាជ្ញាធរកម្ពុជា ដែលបានយកចិត្តទុកដាក់ និងសហការគ្នាបានល្អជាមួយភាគីថៃ តបតាមការស្នើសុំរបស់ភាគីថៃក្នុងការប្រគល់ប្រជាជនរបស់ខ្លួនដែលមកធ្វើការងារដោយខុសច្បាប់ និងសូមឲ្យការទំនាក់ទំនងដ៏ល្អនេះនៅតែបន្តទៀត ដើម្បីប្រជាពលរដ្ឋទាំងពីពិសេសខេត្តដែលនៅជាប់ព្រំដែនតែម្តង ក្នុងប្រស្រ័យទំនាក់ទំនងរកទទួលបានល្អប្រសើរបន្ថែមទៀតផងដែរ៕