ជនសង្ស័យ០៣នាក់ត្រូវបានកម្លាំងការិយាល័យព្រហ្មទណ្ឌ បញ្ជាការដ្ឋានកងរាជអាវុធហត្ថខេត្តបន្ទាយមាជ័យ បញ្ជូនសាលាដំបូងខេត្ត ពាក់ព័ន្ធករណី កាន់កាប់ ឬដឹកជញ្ជូនអាវុធដោយគ្មានការអនុញ្ញាត
ខេត្តបន្ទាយមានជ័យ:ជនសង្ស័យចំនួន០៣នាក់ ត្រូវបានកម្លាំងការិយាល័យព្រហ្មទណ្ឌ បញ្ជាការដ្ឋានកងរាជអាវុធហត្ថខេត្តបន្ទាយមាជ័យ បញ្ជូនខ្លួនទៅសាលាដំបូងខេត្តបន្ទាយមានជ័យ រសៀលថ្ងៃទី២៣ ខែវិច្ឆិកា ឆ្នាំ២០២១នេះពាក់ព័ន្ធករណី កាន់កាប់ ឬដឹកជញ្ជូនអាវុធដោយគ្មានការអនុញ្ញាត។
លោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុងសេរីសោភ័ណ្ឌបានឲ្យដឹងថា ជនសង្ស័យទាំង០៣នាក់ ត្រូវបានឃាត់ខ្លួនកាលពីវេលាម៉ោង១៨និង៣០នាទី ថ្ងៃទី២២ ខែវិច្ឆិកា ឆ្នាំ២០២១ ក្នុងខណ:ពេលដែលលោកដឹកនាំកម្លាំងចុះល្បាតក្នុងភូមិសាស្ត្រក្រុង ដើម្បីការពារសន្តិសុខ សណ្ដាប់ធ្នាប់ជូនប្រជាពលរដ្ឋ លុះដល់
ចំណុចស្ពានថ្មថ្មី ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ស្រាប់តែឃើញជនសង្ស័យដែលជាមុខសញ្ញាចាស់ ឈ្មោះ អាំង ពុយរាំង ភេទប្រុស អាយុ១៧ឆ្នាំ ដែលធ្លាប់ប្រព្រឹត្តហិង្សាដោយចេតនាម្ដងហើយ និងបក្សពួក០២នាក់ទៀត គឺឈ្មោះ ដៀត ដាណាត់ ភេទប្រុស អាយុ១៨ឆ្នាំ និងឈ្មោះ សែង វុធឌី ភេទប្រុស អាយុ១៧ឆ្នាំ ជិ:ម៉ូតូ០១គ្រឿង ម៉ាកហុងដាឃ្លិច ពណ៌ប្រផេះ ពាក់ស្លាកលេខ ភ្នំពេញ 1AP-5910 ។ឃើញដូច្នេះកម្លាំងក៏ធ្វើការឃាត់ម៉ូតូ និងក្រុមជនសង្ស័យទាំង០៣នោះធ្វើការត្រួតពិនិត្យក្នុងការបូបស្ពាយ រកឃើញកាំបិតចំនួន០៣ដើម នៅក្នុងកាបូបស្ពាយរបស់ជនសង្ស័យឈ្មោះ អាំង ពុយរាំង រួចក៏នាំយកមកមូលដ្ឋានកងរាជអាវុធហត្ថក្រុងដើម្បីសួរនាំ ។
នៅចំពោះមុខសមត្ថកិច្ចជនសង្ស័យទាំង៣នាក់បានឆ្លើយសារភាពថា ពួកគេពិតជាបានយកកាំបិតដាក់ក្នុងកាបូបស្ពាយតាមខ្លួនពិតប្រាកដមែន គឺក្នុងគោលបំណងតៀមទុកតបតជាមួយគូរជម្លោះ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឲ្យដឹងថា ជនសង្ស័យទាំង០៣នាក់ ក្រោយពីសាកសួរកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី៕
