ផ្ទុះអាវុធជាច្រើនគ្រាប់ នៅកន្លែងផឹកស៊ីក្នុងក្រុងប៉ោយប៉ែត បណ្ដាលឲ្យមានមនុស្សរងរបួសធ្ងន់ និងស្រាល
ខេត្តបន្ទាយមានជ័យ:ករណីឈានដល់ការផ្ទុះអាវុធជាច្រើនគ្រាប់ កាលពីវេលាម៉ោងប្រមាណជាង១១យប់ ថ្ងៃទី២០ ខែវិច្ឆិកា ឆ្នាំ២០២១ នៅកន្លែងផឹកស៊ីមួយកន្លែង(កុងតឺន័រទឹកពុះ)ចំណុចខាងក្រោយកាស៊ីណូផ្កាយ៥ ទល់មុខកាសុីណូផារ៉ាមិច ស្ថិតនៅក្នុងភូមិក្បាលស្ពាន១ សង្កាត់/ក្រុងប៉ោយប៉ែត ខេត្តបន្ទាយមានជ័យ បណ្ដាលឲ្យមានមនុស្សរបួសធ្ងន់និងស្រាល ក្នុងនោះមានមន្ត្រីកងរាជអាវុធហត្ថម្នាក់ផងដែរ។
បើតាមប្រភពព័ត៌មានពីកន្លែងកើតហេតុបានឲ្យដឹងថា ករណីផ្ទុះអាវុធបង្កការភ្ញាក់ផ្អើល ប្រជាពលរដ្ឋរត់ចែកជើងគ្នាបាតជើងសព្រាតនេះ គឺផ្ដើមចេញពី
ជនជាតិខ្មែរកាងឱ្យមេដែលជាជនជាតិថៃ។
ប្រភពដាច់ដោយឡែកបានបញ្ជាក់ថា នៅមុនពេលកើតហេតុគឺទាំងពីក្រុមរវាងជនជាតិថៃនិងជនជាតិថៃមានជម្លោះនឹងគ្នានៅវេលាក្បាលព្រលប់ លុះដល់វេលាកើតហេតុខាងលើ ខណៈមួយក្រុមទៀតបានដើរស្វែងរកគូរជម្លោះ ក៏បានជួបនៅកន្លែងផឹកស៊ីចំណុចទីតាំងខាងលើ ក៏មានការប្រតាយប្រតប់គ្នា រហូតឈានដល់ភាគីជនជាតិខ្មែរ ដែលកាងឱ្យមេ ដែលជាជនជាតិថៃស្រី២នាក់បានដកកាំភ្លើងបាញ់ប្រមាណ៣០គ្រាប់ បណ្ដាលឲ្យមានអ្នករងរបួស បង្កការភ្ញាក់ផ្អើលដល់អ្នកលក់ដូរនិងអ្នកផឹកស៊ីនៅទីនោះរត់បាតជើងសព្រាត។
ក្រោយពីកើតហេតុភ្លាមកម្លាំងកងរាជអាវុធហត្ថបានចុះធ្វើការអន្តរាគមន៍រហូតឈានដល់ការឃាត់ខ្លួនអ្នកពាក់ព័ន្ធបានចំនួន១៥នាក់ និងកំពុងស្វែងរកបន្ត។
ជុំវិញបញ្ហាខាងលើនេះដែរភ្នាក់ងារយើង មិនអាចសុំការពន្យល់ណាមួយពីជំនាញពាក់ព័ន្ធ ពិសេសមេបញ្ជាការកងរាជអាវុធហត្ថក្រុងប៉ោយប៉ែតបានទេដោយខលចូលមិនមានអ្នកទទួល។
សូមបញ្ជាក់ផងដែរថា ទីតាំងបើកឲ្យមានការផឹកស៊ីយ៉ាងពពាក់ពពូន បង្កឱ្យមានការបាញ់បោះដោយសេរី ដែលនៅជាប់ព្រំដែនកម្ពុជា-ថៃនេះ ជាទីប្រជុំជនដែលប្រជាពលរដ្ឋរស់នៅក្រុងប៉ោយប៉ែតនិយមចូលចិត្តទៅលំហែកាយ ហាត់ប្រាណ និងទទួលទានអាហារបែបលក្ខណៈគ្រួសារជាដើម អាជ្ញាធរមូលដ្ឋានហាក់ដូចជាមិនសូវយកចិត្តទុកដាក់អំពីសន្តិសុខទល់សោះ៕
