ឯកឧត្តម សុខ លូ និងលោកជំទាវអញ្ជើញសំណេះសំណាល សួរសុខទុក្ខ និងចែកជូនអំណោយដល់គ្រួសារប្រជាពលរដ្ឋដែលមានជីវភាពខ្វះខាតចំនួន១៥០គ្រួសារ ក្នុងស្រុកបវេល
ខេត្តបាត់ដំបង:នៅព្រឹកថ្ងៃទី២០ ខែវិច្ឆិកា ឆ្នាំ២០២១ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងលោកជំទាវ បានអញ្ជើញចុះជួបសំណេះសំណាល សួរសុខទុក្ខ និងចែកជូនអំណោយជូនប្រជាពលរដ្ឋដែលមានជីវភាពខ្វះខាតចំនួន១៥០គ្រួសារ ដែលមកពីភូមិសង្កែវារ ភូមិពាម ភូមិកំពង់ព្នៅ និងភូមិសំរោង នៃឃុំបវេល ស្រុកបវេល ខេត្តបាត់ដំបង ដោយក្នុងមួយគ្រួសារទទួលបាន អង្ករ១ការ៉ុង (៥០គីឡូក្រាម) ទឹកសុទ្ធចំនួន១កេស មី១កេស ត្រីខ១យួរ ទឹកស៊ីអីវ១យួរ ទឹកត្រី១យួរ ភួយចំនួន១ ក្រមារចំនួន១ និងថវិកាមួយចំនួនទៀតផងដែរ ។
ឆ្លៀតក្នុងឱកាសនោះ ឯកឧត្តម សុខ លូ បានមានប្រសាសន៍សំណេះសំណាលជាមួយប្រជាពលរដ្ឋ មានប្រសាសន៍ថ្លែងអគុណយ៉ាងជ្រាលជ្រៅ ដល់រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា ដែលសម្ដេចខិតខំប្រឹងប្រែងក្នុងការស្វែងរកសន្ដិភាពជូនប្រជាពលរដ្ឋ និងបញ្ចប់បាននូវសង្រ្គាមផ្ទៃក្នុង ដោយអនុវត្តទៅតាមគោលនយោបាយឈ្នះៗ បានយ៉ាងជោគជ័យ ហើយចំពោះបច្ចុប្បន្នដែលពិភពលោកកំពុងតែប្រយុទ្ធប្រឆាំងនឹងជំងឺកូវីដ-១៩នេះ សម្ដេចបានខិតខំប្រឹងប្រែងគ្រប់បែបយ៉ាង ក្នុងការស្វះស្វែងរកថ្នាំវ៉ាក់សាំងប្រឆាំងជំងឺកូវីដ-១៩ ឲ្យបានចាក់ជូនប្រជាពលរដ្ឋបានគ្រប់ៗគ្នា៕