ទាហានថៃ ឃាត់ខ្លួនពលករខ្មែរប្រុស ស្រីចំនួន៣៣នាក់ ខណ:លួចឆ្លងដែនទៅរកការងារធ្វើដោយខុសច្បាប់
(ថៃ)៖ពលករខ្មែរចំនួន៣៣នាក់ ក្នុងនោះមានស្រីចំនួន១៥នាក់ ដែលចាញ់បោកមេខ្យល់ ចូលតាមច្រករបៀងទៅប្រទេសថៃ ដើម្បីទៅរកការងារធ្វើ ត្រូវបានកម្លាំងកងវរសេនាធំលេខ១៣០២ សហការជាមួយប៉ុស្តិ៍នគរបាល ខ្លងហាត ការិយាល័យស៊ើបអង្កេត នៃស្នងការដ្ឋាននគរបាលខេត្តស្រះកែវ ចាប់ឃាត់កាលពីវេលាម៉ោង១១និង០០នាទីព្រឹក ថ្ងៃទី១០ ខែវិច្ឆិកា ឆ្នាំ២០២១ ត្រង់ចំណុចភូមិបានវ៉ាងម៉ៃ ឃុំបេនចាខុន ស្រុកខ្លងហាដ ខេត្តស្រះកែវ។នេះបើយោងតាមការចុះផ្សាយរបស់សារព័ត៌មានក្នុងស្រុកថៃ។
ប្រភពដដែលបន្តថា ក្រោយពីកម្លាំងសមត្ថកិច្ចឃាត់ខ្លួនសួរនាំ ពួកគេបានឆ្លើយថា ពួកខ្លួនធ្វើដំណើរ ពីខេត្តបន្ទាយមានជ័យ សៀមរាប បាត់ដំបង ចូលទៅប្រទេសថៃ ក្នុងគោលបំណងទៅធ្វើការសំណង់នៅខេត្តឈុនបុរី រ៉ាក់យ៉ង សាមុតប្រាកាន បាងកក និងខ្លះទៀតរើសផ្លែឈើ កាប់អំពៅ នៅចន្ថាបុរី និងស្រះកែវ ដោយមានការទំនាក់ទំនងជាមួយមេខ្យល់ជាជនជាតិខ្មែរ តាមរយៈហ្វេសប៊ុក។
ពលករទាំងនោះបញ្ជាក់ថា មុនលួចឆ្លងដែន ពួកខ្លួនបានប្រមូលផ្តុំគ្នានៅឃុំបឹងបេង ស្រុកម៉ាឡៃ ខេត្តបន្ទាយមានជ័យ ដោយបង់ថ្លៃដឹកជញ្ជូនពីកម្ពុជា ទៅដល់គោលដៅ នៅប្រទេសថៃ ក្នុងម្នាក់ ចំនួន៥.០០០-៩.០០០បាត(ប្រាក់ថៃ) មិនទាន់នឹងដល់គោលដៅផង ក៏ស្រាប់តែកម្លាំងយោធាថៃ ចាប់ខ្លួន ទាំងគ្មានឯកសារលិខិតអនុញ្ញាត ចូល និងលិខិតអនុញ្ញាតការងារ ក្នុងប្រទេសថៃ។
ក្រោយពីឃាត់ខ្លួនកម្លាំងសមត្ថកិច្ចជំនាញពិនិត្យរកមេរោគកូវីដ-១៩ រួចបញ្ជូនទៅកាន់នគរបាលប៉ុស្តិ៍ឃុំខ្លងហាត ដើម្បីចាត់ការបន្តតាមផ្លូវច្បាប់ប្រទេសថៃ៕