សាខាកាកបាទក្រហមកម្ពុជា ខេត្តកំពង់ចាម ផ្តល់ផ្ទះ១ខ្នង ដល់ស្រ្តីមេម៉ាយ ១គ្រួសារ រស់នៅស្រុកស្ទឹងត្រង់
ខេត្តកំពង់ចាម:ឯកឧត្តម ហ៊ុន ណេង អ្នកតំណាងរាស្ត្រមណ្ឌលកំពង់ចាម និងជាប្រធានកិត្តិយសសាខាកាកបាទក្រហមកម្ពុជាខេត្តកំពង់ចាម អមដំណើរដោយឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នៅព្រឹកថ្ងៃទី១៦ ខែតុលា ឆ្នាំ២០២១ អញ្ជេីញប្រគល់ផ្ទះកាកបាទក្រហម កម្ពុជា ១ខ្នង ជូនដល់ស្ត្រីក្មួយស្រី សន វី អាយុ ៣៦ឆ្នាំ ជាស្រីមេម៉ាយទ័លលំបាក មានកូនប្រុសស្រី ៦នាក់ និងចៅស្រី ១នាក់ ក្នុងបន្ទុក ស្ថិតនៅភូមិដីលើ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម។
គួររំលឹកថា កាលពីរសៀល ថ្ងៃទី១១ ខែកញ្ញា ឆ្នាំ២០២១ កន្លងទៅ លំនៅដ្ឋានក្មួយស្រី សន វី ដែលធ្វើពីឈើ ប្រក់សង្កសី ១ខ្នង ទំហំ 5m×7m ត្រូវអគ្គីភ័យឆាបឆេះបំផ្លាញអស់ទាំងស្រុង ដោយសារឆ្លងចរន្តអគ្គិសនី ។ភ្លាមៗនោះ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានចាត់តំណាងចុះផ្តល់ជំនួយសង្រ្គោះបន្ទាន់ ដល់គ្រួសាររងគ្រោះ។ជាមួយនោះ ឯកឧត្តម ហ៊ុន ណេង ក៏បានអញ្ជើញ ចុះពិនិត្យស្ថានភាពរងគ្រោះដល់ទីតាំងដោយផ្ទាល់ ហើយបានសម្រេចផ្តល់ជូន ផ្ទះថ្មី ១ខ្នង ជូនក្មួយស្រី សន វី ដើម្បីបានស្នាក់នៅសមរម្យ។
ក្នុងឱកាសនោះ ឯកឧត្តម ហ៊ុន ណេង បានពាំនាំប្រសាសន៍របស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលផ្តាំផ្ញើសួរសុខទុក្ខ ដោយក្តីនឹករលឹកបំផុត ជូនចំពោះលោកយាយ លោកតា ប្រជាពលរដ្ឋទាំងអស់ និងបានអំពាវនាវ សូមយកចិត្តទុកដាក់គិតគូរថែទាំសុខភាពឱ្យបានល្អ រស់នៅត្រូវមានអនាម័យស្អាត សម្រាន្តក្នុងមុង និង ពិសារទឹកឆ្អិនដាំពុះជានិច្ច ហេីយជាពិសេស ត្រូវបន្តរៀនរស់ជាមួយជម្ងឺកូវីដ-១៩ ដោយអនុវត្តតាមវិធានសុខាភិបាល " ៣ការពារ ៣កុំ និង ២ចូលរួម " ឱ្យបានខ្ជាប់ខ្ជួន ដេីម្បីជៀសផុតពីពីការឆ្លងរាលដាលនៃជំងឺដ៏កាចសាហាវ នេះ។
រដ្ឋបាលខេត្តបញ្ជាក់ថា ផ្ទះ ១ខ្នង ថ្មីនេះ ចំណាយថវិកា ៨.៦៥០ដុល្លារ (ប្រាំបីពាន់ប្រាំមួយរយហាសិបដុល្លារអាមេរិក) សង់ពីឈេីខ្ពស់ផុតពីដី ២ម៉ែត្រ, មានទំហំ 5m x 7m, ដំបូលប្រក់ស័ង្កសីភ្លីធំ, ជញ្ជាំងស្មាបត, រនាបឬស្សី, មានបង្អួច ៣, ជណ្តេីរធ្វើពីឈើ, មានប្រព័ន្ធអគ្គិសនី ប្រេីប្រាស់ថាមពលព្រះអាទិត្យ (Solar) អាចប្រេីទូរទស្សន៍១ កង្ហារ ១ និងអំពូល៥ និង មានផ្ទះបាយជាប់ខាងក្រោយផ្ទះ ។
អំណោយបានផ្តល់ជូនជាសម្ភារ គ្រឿងឧបភោគបរិភោគ រួមមាន ៖ អង្ករ ៥០គីឡូ, មី ០២កេស, ត្រីខ ២០កំប៉ុង, ទឹកត្រី ០១យួរ, ទឹកស៊ីអ៊ីវ ០១យួរ, ឃីត (មុង ភួយ សារុង ក្រមា) ២កញ្ចប់, អាវយឺត ១៦, សម្ភារផ្ទះបាយ និងសម្ភារប្រេីប្រាស់ក្នុងផ្ទះ ចំនួន ២៧មុខ ព្រមទាំងថវិកា ២00,000រៀល។
ដោយឡែក ឯកឧត្តម ហ៊ុន ណេង បានឧបត្ថម្ភបន្ថែមចំនួន៥០០ដុល្លារអាមេរិក។សម្រាប់លោកយាយ លោកតា ចំនួន ២០នាក់ ក្នុងងម្នាក់ៗទទួលបាន ៖ អង្ករ ២៥គីឡូ, ទឹកត្រី ០១យួរ, ទឹកស៊ីអ៊ីវ ០១យួរ, ត្រីខ ១០កំប៉ុង, ឃីត (មុង ភួយ សារុង ក្រមា អាយឺត) ០១កញ្ចប់, អាវយឺត ៤ , ម៉ាស់ ៥បន្ទះ និងថវិកា ២0,000រៀលផងដែរ៕