កម្លាំងវរៈសេនាតូចថ្មើជើងលេខ ៥១៣ ឃាត់ខ្លួនពលករខ្មែរប្រុស ស្រីចំនួន៣៧នាក់ បម្រុង លួចឆ្លង ដែនខុសច្បាប់ចូលទៅប្រទេសថៃ
ខេត្តបន្ទាយមានជ័យ៖កម្លាំងវរៈសេនាតូចថ្មើជើងលេខ៥១៣ ឃាត់ខ្លួនពលករខ្មែរ ប្រុស ស្រី ចំនួន៣៧នាក់ ដែលបម្រុងលួចឆ្លងដែនទៅរកការងារធ្វើនៅប្រទេសថៃ ដោយខុសច្បាប់។ការឃាត់ខ្លួនពលករខ្មែរប្រុស ស្រីទាំង៣៧នាក់នេះ បានធ្វើឡើង នៅយប់ថ្ងៃទី១៤ ខែតុលា ឆ្នាំ២០២១ នៅ ជួរមុខ តាមខ្សែរបន្ទាត់ព្រំដែន កម្ពុជា- ថៃ ស្ថិតនៅក្នុងភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ខណៈដែលកម្លាំងកំពុងចុះត្បាត។
លោកវរសេនីយ៍ទោ យូ សុគន្ធ ភក្តី មេបញ្ជាការ វរសេនាតូចថ្មើរជើង លេខ ៥១៣ បានឲ្យដឹងថា ខណៈដែលលោកកំពុងដឹកនាំកម្លាំង១ក្រុម សហការជាមួយកម្លាំងចម្រុះចុះល្បាតនៅតាមខ្សែរបន្ទាត់ព្រំដែនកម្ពុជា-ថៃ ត្រង់ចំណុចខាងលើក៏បានប្រទះឃើញពលករខ្មែរទាំង៣៧នាក់ ក្នុងនោះមានស្រី១៨នាក់ ដែលបម្រុងលួចឆ្លងដែនចូលទៅប្រទេសថៃខុសច្បាប់ ភ្លាមនោះកម្លាំងក៏បានឃាត់ខ្លួន ហើយប្រគល់ទៅឲ្យកម្លាំងជំនាញ ដើម្បីអនុវត្តទៅតាមច្បាប់។
លោកវរសេនីយ៍ទោ បន្តថា ពលករទាំង៣៧នាក់ នេះក្រោយពីសួនាំបាននិយាយថា ក្រុមខ្លួនបានលួចឆ្លងដែន ដោយខុសច្បាប់ ចូលទៅក្នុងទឹកដីថៃ ដើម្បីស្វែងរកការងារធ្វើក្នុងខេត្តផ្សេងៗ ក្រោយពេលឃាត់ខ្លួនកម្លាំងយោធាបានឲ្យក្រុមគ្រូពេទ្យជំនាញពិនិត្យសុខភាពពួកគេទាំងអស់គ្នាជាមុន ដើម្បីទប់ស្កាត់ការរីករាលដាលជំងឺកូវី-១៩ ចូលក្នុងសហគមន៍។
ពលករទាំងអស់ក្រោយពីក្រុមគ្រូពេទ្យពិនិត្យហើយធ្វើការអប់រំ និងយកទៅធ្វើចត្តាឡីស័កនៅទីនោះរួចរាល់ហើយឲ្យវិលត្រឡប់ទៅលំនៅដ្ឋានរៀងៗវិញ។សូមបញ្ជាក់ថា ដើម្បីចូលរួមចំណែក ជាមួយរាជរដ្ឋាភិបាល ក្នុងការទប់ស្កាត់ការរីករាលដាល នៃជំងឺកូវីដ-១៩ កុំឲ្យឆ្លងចូលសហគមន៍ កម្លាំងវរសេនាតូចថ្មើរជើងលេខ ៥១៣ បានយកចិត្តទុកដាក់ អនុវត្តតាម បទបញ្ជា ថ្នាក់លើទាំង ៣ ទិស ក្នុងខេត្តបន្ទាយមានជ័យ ចាប់ពីទិសអូរនាងប៉ោយប៉ែត និងទិសម៉ាឡៃ សហការជាមួយកម្លាំង នៅតាមមូលដ្ឋាន ចេញល្បាតឆែកឆេរ ត្រួតពិនិត្យជាប្រចាំក្នុងការទប់ស្កាត់ ពលករឆ្លងដែន ខុសច្បាប់ជាប្រចាំផងដែរ៕
