មេបញ្ជាការស្តីទី៖តួនាទីភារកិច្ចកងកម្លាំង ត្រូវស្មោះត្រង់ ការពារដាច់ខាត ជាតិ សាសនា ព្រះមហាក្សត្រ រាជរដ្ឋាភិបាល ការពារឲ្យបាននូវសុខសន្តិភាព ស្ថិរភាពនយោបាយ សណ្តាប់ធ្នាប់សង្គមជាតិមាតុភូមិ
ខេត្តបន្ទាយមានជ័យ៖ដោយអនុវត្តន៍តាមបទបញ្ជារបស់មេបញ្ជាការ កងទ័ពជើងគោក និងមេបញ្ជាការ យោធភូមិភាគទី៥ ដើម្បីត្រៀមកម្លាំងអន្តរាគមន៍ ដោះស្រាយនូវបញ្ហាកើតឡើងជា យថាហេតុផ្សេងៗ ក្នុងអំឡុងពេលឈប់សម្រាក សងបុណ្យចូលឆ្នាំថ្មីប្រពៃណីជាតិខ្មែរ រួមទាំងថ្ងៃសៅរ៍ អាទិត្យសរុបរយះពេល៩ថ្ងៃ នាព្រឹកថ្ងៃទី១៥ ខែសីហា ឆ្នាំ២០២០ លោកវរសេនីយ៍ឯក សឹង្ហ ទុំ មេបញ្ជាការស្តីទី កងពលតូចថ្មើរជើងលេខ៥១ បានដឹកនាំកម្លាំងអញ្ជើញចុះត្រួតពិនិត្យ កម្លាំងអន្តរាគមន៍ សម្ភារ យោធូបករណ៍ មធ្យោបាយដឹកជញ្ជូន និងសម្ភារ ត្រៀមជួយសង្រ្គោះប្រជាពលរដ្ឋ ដោយគ្រោះមហន្តរាយធម្មជាតិផ្សេងៗ នៅទីបញ្ជាការ កងពលតូចថ្មើរជើងលេខ៥១ ដែលស្ថិតនៅភូមិជប់វារី ស្រុកព្រះនេត្រព្រះ ខេត្តបន្ទាយមានជ័យ។
លោកមេបញ្ជាការស្តីទី បញ្ជាក់ថា កម្លាំងត្រៀមអន្តរាគមន៍២៤ម៉ោងលើ២៤ម៉ោង ត្រៀមសហការជាមួយកម្លាំងសមត្ថិកិច្ចគ្រប់ប្រភេទ អជ្ញាធរមូលដ្ឋាន ក្នុងភូមិសាស្រ្ត ទទួលខុសត្រូវ ដើម្បីចូលរួមថែរក្សាសន្តិសុខ សណ្តាប់ធ្នាប់ និងសុវត្ថិភាពសង្គម ទប់ស្កាត់ និងបង្រ្កាបឲ្យបានទាន់ពេលវេលា រាល់អំពើហឹង្សា ឧក្រិដ្ឋកម្ម ឃាតកម្ម និងភេរវកម្ម ដើម្បីឲ្យប្រជាពលរដ្ឋ គ្រប់ស្រទាប់ គ្រប់សញ្ជាតិ បានកំសាន្តសប្បាយ ប្រកបដោយសុខសុវត្ថិភាព។
ចំពោះច្បាប់ឈប់សម្រាកត្រូវប្តូរវេនគ្នា តាមបទបញ្ជា របស់ថ្នាក់លើ ដោយមានចុះហត្ថលេខាពីមេបញ្ជាការ តាមឋានានុក្រម ហើយត្រូវអនុវត្តន៍តាមការណែនាំ និងវិធានការការពារជម្ងឺឆ្លងកូវីដ១៩ របស់ក្រសួងសុខាភិបាល។
ជាងនេះទៅទៀត លោកមេបញ្ជាការស្តីទី បានសង្គាត់ធ្ងន់ថា ក្នុងតួនាទីភារកិច្ចជាកងកម្លាំងទាំងអស់ ត្រូវគោរព អនុវត្តន៍រាល់បទបញ្ជារបស់ថ្នាក់លើដាក់ចុះ ស្មោះត្រង់ ការពារដាច់ខាត ជាតិ សាសនា ព្រះមហាក្សត្រ រាជរដ្ឋាភិបាល ការពារអោយបាននូវសុខសន្តិភាព ស្ថិរភាពនយោបាយ សណ្តាប់ធ្នាប់សង្គម ជាតិមាតុភូមិ៕
