រដ្ឋបាលខេត្តត្បូងឃ្មុំ បើកកិច្ចប្រជុំបូកសរុបរបាយការណ៍ ការងារគ្រោះមហន្តរាយឆ្នាំ២០១៩ និងទិសដៅការងារ២០២០
ខេត្តត្បូងឃ្មុំ៖ឯកឧត្តម គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ និងឯកឧត្តម ស៊ាក ឡេង ប្រធានក្រុមប្រឹក្សាខេត្ត បានអញ្ជើញជាអធិបតីក្នុងកិច្ចប្រជុំបូកសរុបរបាយការណ៍ ការងារគ្រោះមហន្តរាយឆ្នាំ២០១៩ និងទិសដៅការងារ២០២០។កិច្ចប្រជុំនេះបានធ្វើឡើងកាលពីរសៀល ថ្ងៃទី២៣ ខែកុម្ភៈ ឆ្នាំ២០២០ នៅសាលប្រជុំ(គ)សាលាខេត្តត្បូងឃ្មុំ។
ឯកឧត្ដមបណ្ឌិត ជាម ច័ន្ទសោភ័ណ អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានឱ្យដឹងថា ក្នុងឆ្នាំ២០១៩កន្លងទៅទូទាំងខេត្តទទួលរងគ្រោះទឹកជំនន់ប៉ះពាល់ប្រជាជនចំនួន១៩,៩២៧គ្រួសារ និងត្រូវជម្លៀសពលរដ្ឋទៅកាន់ទួលសុវត្ថិភាពចំនួន៣,២៥៨គ្រួសារ ផ្លូវថ្នល់ សាលារៀន និងវត្តអារាមជាច្រើនរងការជន់លិច។
ដោយឡែកគ្រោះរាំងស្ងួតបានប៉ះពាល់ស្រូវនិងដំណាំផ្សេងៗចំនួន១០,៧២១ហិចតា សង្គ្រោះឡើងវិញបានចំនួន៩,២៨២ហិចតា ខ្យល់កន្ត្រាក់ចំនួន៤៣លើក ខូចផ្ទះ៥៨៤ខ្នង អគ្គីភ័យចំនួន១២លើក ឆេះផ្ទះ៣៤ខ្នង។
ឯកឧត្តមទេសរដ្ឋមន្រ្តី គន់ គីម បានថ្លែងការកោតសរសើរ និងវាយតម្លៃខ្ពស់ចំពោះអ្នកពាក់ព័ន្ធទាំងអស់ដែលខិតខំជួយសង្គ្រោះលើកិច្ចការងារនេះ ព្រមទាំងបានធ្វើការណែនាំ ដល់គ្រប់មន្ត្រី និងអ្នកពាក់ព័ន្ធត្រូវរួមសហការគ្នាត្រៀមឆ្លើយតប ក្នុងការងារជួយសង្រ្គោះប្រជាពលរដ្ឋ ដែលងាយរងគ្រោះ និងរងគ្រោះដោយគ្រោះមហន្តរាយធម្មជាតិផ្សេងៗ ឲ្យបានទាន់ពេលវេលា និងមានប្រសិទ្ធភាពខ្ពស់៕