ឃាត់ខ្លួនបុរសកែភេទជាស្រី ឡាយលក់ខ្លួននៅលើ Bigo Live បញ្ជូនខ្លួនទៅតុលាការ
រាជធានីភ្នំពេញ៖បុរសកែភេទជាស្រីឈ្មោះ ម៉ន អ៊ីវ៉ា អាយុ២៦ឆ្នាំ ត្រូវបានសមត្ថកិច្ចនៃអធិការដ្ឋាននគរបាលខណ្ឌទួលគោក បញ្ជូនទៅតុលាការនៅវេលាម៉ោង១៤និង៣០នាទីនៅថ្ងៃទី២២ ខែកុម្ភ: ឆ្នាំ២០២០នេះ ដើម្បីអនុវត្តបន្តតាមនីតិវិធីច្បាប់ បន្ទាប់ពីថតឡាយវីដេអូរលក់ខ្លួននៅលើ Bigo Live
លោកវរសេនីយ៍ទោ សុខ ហេង អធិការនគរបាលខណ្ឌទួលគោក បានប្រាប់អ្នកសារព័ត៌មានឱ្យដឹងថា ការចាប់ឃាត់ខ្លួនបុរសកែភេទជាស្រីខាងលើនេះ បានធ្វើឡើងដោយមានការឯកភាពយល់ព្រមពីលោក សឿ ឡង់ឌី ព្រះរាជអាជ្ញារងអមសាលាដំបូងរាជធានីភ្នំពេញ នៅល្ងាចថ្ងៃទី២០ ខែកុម្ភៈ ឆ្នាំ២០២០ សមត្ថកិច្ចនៃអធិការដ្ឋាននគរបាលខណ្ឌទួលគោក បានចុះទៅនាំខ្លួន ដើម្បីយកមកធ្វើការសាកសួរ និងរៀបចំសំណុំឯកសារ និងភស្តុតាងផ្សេងៗ បញ្ជូនបន្តទៅតុលាការ ដើម្បីអនុវត្តតាមនីតិវិធីច្បាប់ ពីព្រោះទង្វើដែលឈ្មោះ ម៉ន អ៊ីវ៉ា បានធ្វើនេះពិតជាធ្វើឱ្យប៉ះពាល់ដល់ប្រពៃណីទំនៀមទំលាប់ខ្មែរ ជាពិសេសប៉ះពាល់យ៉ាងធ្ងន់ធ្ងរដល់កិត្តិយស និងតំលៃរបស់ស្ត្រីខ្មែរតែម្តង៕
