ឃាត់ខ្លួនជនសង្ស័យ២នាក់ ពាក់ពន្ធ័ករណីជួញដូរនិងប្រើប្រាស់ នូវសារធាតុញៀន
ខេត្តកំពង់ស្ពឺ៖កម្លាំងប៉ុស្តិ៍នគរបាលរដ្ឋបាលដំបូករូង សហការជាមួយក្រុមប្រឹក្សាឃុំ និងប្រជាការពារ ភូមិមានជ័យ និងភូមិត្រពាំងខ្លុង កាលពីថ្ងៃទី២១ ខែកុម្ភៈ ឆ្នាំ២០២០ បានចុះល្បាតតាមគោលដៅ ក្នុងភូមិសាស្ត្រ ដែលបានទទួលដំណឹងពីប្រជាពលរដ្ឋ រាយការណ៍ថា នៅក្នុងខ្ទមចាំចំការរបស់ឈ្មោះឃីម យីត ភេទប្រុស អាយុ៣១ឆ្នាំ នៅចំណុចចំការស្វាយ ភូមិមានជ័យ ឃុំដំបូករូង ស្រុកភ្នំ ស្រួច ខេត្តកំពង់ស្ពឺ មានការសង្ស័យប្រើប្រាស់ និងជួញដូរគ្រឿងញៀន។
ភ្លាមនោះកម្លាំងមូលដ្ឋានប៉ុស្ត៏ក៏បានពួនស្ទាក់ឃ្លាំមើល ស្របពេលនោះក៏ឃើញឈ្មោះ សា ម៉េតតាំង ភេទប្រុស អាយុ៣៧ឆ្នាំ រស់នៅភូមិទឹកថ្លា ឃុំដំបូករូង ស្រុកភ្នំស្រួច បានជិះម៉ូតូ០១គ្រឿង ម៉ាកស៊ុយ ស៊ូគីឡែត ពណ៌ក្រហម ស ពាក់ស្លាកលេខ ភ្នំពេញ 1HP.9717 រួចក៏បានឃាត់ឆែកឆេរកឃើញ ម៉្សៅ ក្រាម ពណ៌សថ្លា០១កញ្ចក់តូច ទូរស័ព្ទដៃ០១គ្រឿងម៉ាកណូគារ កូនសោរម៉ូតូ០២ និងកូនសោរមួយ ចំនួនទៀតក្នុងកែបម៉ូតូ។
បន្ទាប់មកក៏បានចូលទៅត្រួតពិនិត្យក្នុងខ្ទមចាំចំការបានឃាត់ខ្លួនឈ្មោះ ឃីម យីត ភេទប្រុស អាយុ៣១ឆ្នាំ ជាម្ចាស់ចំការស្វាយ និងដកហូតបានម៉្សៅក្រាម ពណ៌សថ្លាចំនួន០៣កញ្ចប់តូច ទូរស័ព្ទដៃ០១គ្រឿងម៉ាកខែមហ្វូន និងសម្ភារៈប្រើប្រាស់គ្រឿងញៀនមួយចំនួនទៀតនាំមកសាកសួរនៅប៉ុស្ដិ៍នគរបាលរដ្ឋបាលដំបូករូង ដើម្បីកសាងសំណុំរឿងបញ្ជូនទៅផ្នែកជំនាញ ប្រឆាំងគ្រឿងញៀនស្រុកកសាងសំណុំរឿង បន្តតាមនិតិវិធី៕
