បុរសពូកែ ខាងលួចគណនីហ្វេសប៊ុកអ្នកដទៃ(ឆាតChat )ឲ្យផ្ញើប្រាក់ឲ្យខ្លួន ត្រូវបានកម្លាំងនគរបាល ខេត្តបាត់ដំបង ឃាត់ខ្លួនបញ្ជូនទៅតុលាការ
រាជធានីភ្នំពេញ៖ដោយអនុវត្តតាមបទបញ្ជារបស់ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងអនុវត្តតាមដីកាបង្គាប់របស់អយ្យការអមសាលាដំបូង រាជធានីភ្នំពេញ ព្រមទាំងបានការសម្របសម្រួលលើនីតិវិធីពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបង ក៏ដូចការស្នើសុំកិច្ចសហការណ៍អនុវត្តរបស់នាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការដ្ឋាននគរបាលជាតិ កាលពីថ្ងៃទី១៩ ខែកុម្ភៈ ឆ្នាំ២០២០ លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទ័ណ្ឌ បានដឹកនាំមន្ត្រីនគរបាលក្នុងក្រុមការងារអនុវត្តដីកា នៃស្នងការដ្ឋាន សហការណ៍ជាមួយកម្លាំងនគរបាល នៃអធិការដ្ឋាននគរបាលស្រុកបាណន់ ធ្វើការនាំខ្លួនឈ្មោះ រ៉េន សារី ភេទប្រុស អាយុ៣០ឆ្នាំ មានទីលំនៅសង្កាត់ ចំការសំរោង ក្រុងបាត់ដំបង ខេត្តបាត់ដំបង ពាក់ព័ន្ធករណីលួចយកគណនីហ្វេសប៊ុកអ្នកដទៃដើម្បី(ឆាតChat)ឲ្យគេផ្ញើប្រាក់មកឲ្យខ្លួន ដោយចេតនានាពេលកន្លងទៅ។
សូមជម្រាបជូនថា កាលពីថ្ងៃទី២០ ខែធ្នូ ឆ្នាំ២០១៩ កន្លងទៅថ្មីៗនេះសមត្ថកិច្ចនគរបាលនៃស្នងការដ្ឋាននគរបាលខេត្តបាត់ដំបង បានសហការណ៍ជាមួយមន្រ្តីនគរបាល នៃស្នងការដ្ឋាននគរបាលខេត្តកែប បានធ្វើការឃាត់ខ្លួនជនស័ង្សយចំនួន០២នាក់ភេទប្រុសក្នុងករណី (លួចបន្លំគណនីហ្វេសប៊ុករួចផ្ញើសារឲ្យអ្នកដទៃផ្ញើប្រាក់មកឲ្យខ្លួន) កាលពីថ្ងៃទី១៨ ខែធ្នូ ឆ្នាំ២០១៩ ហើយក្នុងសកម្មភាពជាបន្តបន្ទាប់មានការចូលរួមរបស់ឈ្មោះ រ៉ែន សារី នេះផងដែរ។
បច្ចុប្បន្នជនស័ង្សយ ត្រូវបានបញ្ជូនទៅកាន់អយ្យការអមសាលាដំបូង រាជធានីភ្នំពេញ ដើម្បីចាត់ការតាមនិតិវិធី៕