បុរសម្នាក់ បែកខ្លួនខ្ទេចខ្ទីស្លាប់ មើលលែងយល់ ដោយសារថយន្តបែនដឹកថ្ម បើកបុកម៉ូតូកិនពីលើ
រាជធានីភ្នំពេញ៖បុរសម្នាក់បែកខ្លួនខ្ទេចខ្ទីស្លាប់ នៅនឹងកន្លែងកើតហេតុយ៉ាងអាណោចអាធ័ម ខណៈកំពុងជិះម៉ូតូមួយគ្រឿងត្រូវរថយន្តបែនដឹកថ្មបុកពីក្រោយ និងកិនពេញទំហឹងរួចព្យាយាមបើក រាប់រយម៉ែត្រត្រូវបងប្អូនជាពលរដ្ឋដេញចាប់បានមកវិញ។
ហេតុការណ៍នេះកើតឡើងកាលពីវេលាម៉ោង១០និង៣០នាទីយប់ថ្ងៃទី១៧ ខែមករា ឆ្នាំ២០២០ នៅចំណុចមុខផ្សារស្ទឹងមានជ័យចាស់ តាមបណ្ដោយផ្លូវ២១៧ ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
សពជនរងគ្រោះមិនស្គាល់អត្តសញ្ញាណនៅឡើយនោះទេ។
តាមប្រភពពីប្រជាពលរដ្ឋឃើញហេតុការណ៍នេះបានឱ្យដឹងថា មុនកើតហេតុគេឃើញបុរសម្នាក់ជិះម៉ូតូ កូនទា មួយគ្រឿងពណ៌ក្រហមលាយសពាក់ស្លាកលេខភ្នំពេញ1GV-0472ធ្វើដំណើរតាមមិនដោយផ្លូវ ២១៧ ទិសដៅពីលិចទៅកើតលុះមកដល់ចំណុចកើតហេតុខាងលើក៏មានរថយន្តបែនដឹកថ្មមួយគ្រឿងក្បាលពណ៌សពាក់ស្លាកលេខព្រះសីហនុ3A-2810បើកបរដោយបុរសម្នាក់ទិសដៅស្របគ្នាមកពីក្រោយជ្រុលទៅបុកម៉ូតូបណ្ដាលដួលទៅនឹងថ្នល់ ចំណែកជនរងគ្រោះទ្ទាតទៅចូលកង់រថយន្ត ខាងក្រោយផ្នែកខាងស្ដាំរួចកិនពែញទំហឹង។
ប្រភពដដែលបានបន្តទៀតថា ជនរងគ្រោះមុននឹងស្លាប់បានស្រែកឲ្យគេជួយដែរតែរថយន្តបង្ក មិនឈប់បានបើកកិនពីលើ បណ្ដាលឲ្យជនរងគ្រោះបែកខ្លួនខ្ទេចខ្ទីស្លាប់ នៅនឹងកន្លែងកើតហេតុយ៉ាងអាណោចអាធ័ម។ចំណែករថយន្តបង្កព្យាយាមបើករត់មកដល់ ចំណុចមុខវត្តស្ទឹងមានជ័យ ត្រូវបានបងប្អូនប្រជាពលរដ្ឋ ឃើញហេតុការណ៍នេះ ក៏បាននាំគ្នាជួយដេញចាប់បានរថយន្ត និងអ្នកបើកបររួចទៅប្រលគល់ឲ្យសមត្ថកិច្ចនាំខ្លួនយកទៅប៉ុស្តិ៍នគរបាលស្ទឹងមានជ័យទី ២សួនាំបន្ត ដើម្បីទុកប្រគល់ជូនសមត្ថកិច្ចជំនាញ។
ក្រោយកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំធ្វើការដោះស្រាយគ្នានៅពេលក្រោយ។ដោយឡែកសពជនរងគ្រោះសមត្ថកិច្ចធ្វើកំណត់ហេតុនិងធ្វើការស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី៕