បញ្ជូនខ្លួនជនសង្ស័យម្នាក់ ទៅតុលាការ ករណីលួច
រាជធានីភ្នំពេញ៖បុរសម្នាក់ត្រូវបានកម្លាំងសមត្ថកិច្ចជំនាញ នៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បញ្ជូនទៅតុលាការ កាលពីថ្ងៃទី១៨ ខែមករា ឆ្នាំ២០២០ ដើម្បីផ្តន្ទាទោសតាមច្បាប់ ពាក់ព័ន្ធករណីលួច(ទូរស័ព្ទដៃ)។
សមត្ថកិច្ចបានឲ្យដឹងថា ជនសង្ស័យមានឈ្មោះ ថោង សារឹទ្ធ ភេទប្រុស អាយុ៣៦ឆ្នាំ ត្រូវបានកម្លាំងមូលដ្ឋានអាវុធហត្ថខណ្ឌមានជ័យ ឃាត់ខ្លួនកាលពីថ្ងៃទី១៥ ខែមករា ឆ្នាំ២០២០ វេលាម៉ោង២០និង៣០នាទី នៅចំណុចបន្ទប់លេខ៣០២ ជាន់ទី២ ភូមិឬស្សី សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។
សមត្ថកិច្ចបន្តថា៖មុនពេលសមត្ថកិច្ចអាវុធហត្ថឃាត់ខ្លួនជនសង្ស័យខាងលើ បានធ្វើសកម្មភាពដើរមើលនៅតាមបន្ទប់ជួល ចំណុចខាងលើ ស្រាប់តែដើរដល់មុខបន្ទប់លេខ៣០២ ជាន់ទី២ ឃើញទ្វារបន្ទប់ចំហរ ហើយម្ចាស់បន្ទប់ដេកលក់ ភ្លាមនោះរូបគេបានដើរលបៗចូល ទៅក្នុងបន្ទប់នោះ លួចយកបានទូរស័ព្ទដៃ០១គ្រឿង ម៉ាកBingo ពណ៍ខ្មៅទុកលើតុមុខទូរទស្សន៍ ខណៈពេលនោះស្រាប់តែម្ចាស់បន្ទប់ភ្ញាក់ដឹងខ្លួនទាន់ស្រែកឆោរឡោ រូបគេបានរត់គេចខ្លួន ចុះដល់ដល់ជាន់ផ្ទាល់ដី ស្រាប់តែមានប្រជាពលរដ្ឋនៅក្បែរនោះឃើញហេតុការណ៍បានដេញ ផ្អើលដល់សមត្ថកិច្ចអាវុធហត្ថខណ្ឌមានជ័យ ដែលនៅក្បែរនោះឃើញ បានចុះមកធ្វើការឃាត់ខ្លួនតែម្តង។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានលួចទូរសព្ទ័របស់គេមែន ហើយកាលអំឡុងឆ្នាំ២០១៤កន្លងមក រូបគេធ្លាប់ជាប់ពន្ធនាគារព្រៃសរ មួយឆ្នាំកន្លះ ពីបទ ទទួលផលចោរកម្មផងដែរ៕