សម្តេចតេជោ ហ៊ុន សែន អណរគុណដល់វិនិយោគិនវៀតណាម ដែលជ្រើសរើសកម្ពុជាជាកន្លែងវិនិយោគ និងការពង្រីកអាជីវកម្មផ្សេងៗ
រាជធានីភ្នំពេញ៖សម្តេចអគ្គមហាសេនាបតីតេជោ ហ៊ុន សែន ននាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថ្លែងអណរគុណដល់វិនិយោគិនវៀតណាមដែលជ្រើសរើសកម្ពុជាជាកន្លែងវិនិយោគ និងការពង្រីកអាជីវកម្មផ្សេងៗស្របទៅតាមគោលការណ៍របស់រាជរដ្ឋាភិបាល និងការលើកទឹកចិត្តសម្រាប់ការវិនិយោគ ការធ្វើធុរកិច្ចដែលមានលក្ខណៈប្រកួតប្រជែងស្មើភាព ការការពារសិទ្ធិនិងផលប្រយោជន៍ស្របច្បាប់ និងការវិនិយោគលើគ្រប់វិស័យ ដើម្បីពង្រីកទំហំពាណិជ្ជកម្មរវាងប្រទេសទាំងពីរអោយសម្រេចតាមគោលដៅដែលបានគ្រោងទុក ហើយកម្ពុជានៅតែត្រូវការការវិនិយោគពីវៀតណាម ជាពិសេសការកែច្នៃផលិតផលកម្ពុជាទៅកាន់ប្រទេសវៀតណាម។
សម្តេចមានប្រសាសន៍បែបនេះក្នុងឱកាសដែល សម្តេចបានអញ្ជើញចូលរួមពិសារអាហារអបអរសាទរ បុណ្យចូលឆ្នាំថ្មីរបស់វៀតណាម កាលពីល្ងាចថ្ងៃសុក្រ ៨រោច ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងទី១៧ ខែមករា ឆ្នាំ២០២០នេះ នៅសណ្ឋាគារសុខាភ្នំពេញ។
ពិធីនេះ មានការអញ្ជើញចូលរួមពីមន្ត្រីជាន់ខ្ពស់រាជរដ្ឋាភិបាលកម្ពុជា, ឯកអគ្គរដ្ឋទូតវៀតណាមប្រចាំនៅកម្ពុជា លោក វូ ក្វាងមិញ, ពាណិជ្ជករ អ្នកជំនួញខ្មែរ និងវៀតណាម ព្រមទាំងប្រជាពលរដ្ឋវៀតណាមមួយចំនួនទៀត ដែលកំពុងរស់នៅក្នុងប្រទេសកម្ពុជាផងដែរ។
ក្នុងឱកាសនោះសម្តេចតេជោ ហ៊ុន សែន បានបង្ហាញនូវក្តីរីករាយដែលបានអញ្ជើញចូលរួមក្នុងពិធីអបអរសាទរ នៃបុណ្យចូលឆ្នាំថ្មីប្រពៃណីវៀតណាមដែលនឹងចូលមកដល់នាពេលខាងមុខ។ទន្ទឹមនឹងនោះ សម្តេចតេជោបានមានប្រសាសន៍បន្តទៀតថា ការជួបជុំនេះគឺជាការឆ្លុះបញ្ចាំងពីទំនាក់ទំនងរវាងប្រទេសជិតខាងល្អ ការជឿទុកចិត្តគ្នាទៅវិញទៅមក និងការគោរពគ្នាទៅវិញទៅមក ជាពិសេសលើគ្រប់វិស័យរវាងប្រទេសយើងទាំងពីរដែលសម្រេចបាននូវវឌ្ឍនភាពល្អទាំងវិស័យសេដ្ឋកិច្ច ពាណិជ្ជកម្ម នយោបាយ និងការទូត។
នេះជាឆ្នាំទីមួយដែល សម្ដេចតេជោនាយករដ្ឋមន្ត្រីបានជួបជុំជាមួយបងប្អូន អ្នកវិនិយោគវៀតណាម មុនបុណ្យចូលឆ្នាំវៀតណាមមកដល់ ហើយសម្តេចបានសម្រេចអោយមានការជួបបែបនេះនៅឆ្នាំបន្តបន្ទាប់ទៀត ដើម្បីពង្រឹងចំណងមិត្តភាព និងបង្កើននូវជំនឿទុកចិត្តរវាងគ្នានិងគ្នា ជាពិសេសគឺពង្រឹងការជឿទុកចិត្តរវាងវិនិយោគិនវៀតណាមនៅកម្ពុជា៕
