ស្នងការនគរបាល ខេត្តមណ្ឌលគិរី បើកកិច្ចប្រជុំត្រួតពិនិត្យ និងផ្សព្វផ្សាយផែនការ ស្តីពីការចុះធ្វើវេទិកាផ្សព្វផ្សាយគោលនយោបាយភូមិ ឃុំមានសុវត្ថិភាព
ខេត្តមណ្ឌលគិរី៖នៅព្រឹកថ្ងៃសុក្រ ៨រោច ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែមករា ឆ្នាំ២០២០ លោកឧត្តមសេនីយ៍ទោ ឡោ សុខា ស្នងការដ្ឋាននគរបាលខេត្តមណ្ឌលគីរី បានដឹកនាំកិច្ចប្រជុំត្រួតពិនិត្យ និងផ្សព្វផ្សាយផែនការស្តីពី ការចុះធ្វើវេទិកាផ្សព្វផ្សាយគោលនយោបាយភូមិ ឃុំមានសុវត្ថិភាព និងការងារនគរបាលនិងសហគមន៍ ដល់អធិការដ្ឋាននគរបាលក្រុង-ស្រុកទាំង៥ និងប៉ុស្តិ៍នគរបាលរដ្ឋបាលទាំង២១ឃុំ-សង្កាត់ នៅសាលប្រជុំស្នងការដ្ឋាននគរបាលខេត្ត ដោយមានអ្នកចូលរួមសរុបចំនួន៥៧នាក់ នៅសាលប្រជុំស្នងការដ្ឋាននគរបាលខេត្ត។
ក្នុងឱកាសនោះដែរ លោកឧត្តមសេនីយ៍ស្នងការ បានណែនាំដល់ប៉ុស្តិ៍នគរបាលរដ្ឋបាល ត្រូវគោរពវិន័យរបស់កងកម្លាំងនគរបាលជាតិឲ្យបានល្អ និងត្រូវបង្កើនការយកចិត្តទុកដាក់ក្នុងការអនុវត្តផែនការគោលនយោបាយភូមិ ឃុំមានសុត្ថិភាព សំដៅអនុវត្តទម្រង់ទាំង៤ និងត្រូវមានមុខបម្រើការងារក្នុងអង្គភាព ដើម្បីបម្រើសេវាសាធារណ:ជូនប្រជាពលរដ្ឋ និងឲ្យការងារកាន់តែមានប្រសិទ្ធភាពខ្ពស់បន្ថែមទៀត ជាពិសេសត្រូវបន្តកិច្ចការរបស់ខ្លួនចុះល្បាតនៅតាមគោលដៅសំខាន់ៗ ក្នុងមូលដ្ឋាន ដើម្បីបង្ការ ទប់ស្កាត់នូវរាល់បណ្តាបទល្មើសផ្សេងៗ កើតឡើងបានទាន់ពេលវេលា និងត្រូវរួមសាមគ្គីគ្នាយ៉ាងស្អិតរមួតក្នុងកិច្ចប្រតិបត្តិការផ្សព្វផ្សាយច្បាប់ផ្សេងៗ ដល់ប្រជាពលរដ្ឋឲ្យបានទូលំទូលាយថែមទៀត៕
