សហរដ្ឋអាមេរិក ព្រមលក់មីស៊ីលមានតម្លៃ ៣.៣ពាន់លានដុល្លារឱ្យជប៉ុនហើយ
(វ៉ាស៊ីនតោន)៖ក្រសួងការបរទេសអាមេរិក បានយល់ព្រមលក់មីស៊ីលមានតម្លៃជាង ៣.៣ពាន់លានដុល្លារឱ្យទៅប្រទេសជប៉ុន ក្រោយមានការគំរាមកំហែងពីកូរ៉េខាងជើងតាមរយះការបាញ់សាកល្បងមីស៊ីលជាបន្តបន្ទាប់ចូលក្នុងសមុទ្រជប៉ុន។នេះបើយោងតាមការចុះផ្សាយរបស់ទីភ្នាក់ងារព័ត៌មាន រ៉យទើ នៅថ្ងៃទី២៨ ខែសីហា ឆ្នាំ២០១៩ នេះ។
នៅក្នុងសេចក្ដីថ្លែងការណ៍ចេញផ្សាយ នៅថ្ងៃអង្គារសប្ដាហ៍នេះ ទីភ្នាក់ងារកិច្ចសហប្រតិបត្តិការ សន្តិសុខការពារជាតិ នៃមន្ទីរបញ្ចកោណ បានគូសបញ្ជាក់ដូច្នេះថា៖« ការលក់មីស៊ីលឱ្យប្រទេសជប៉ុន នឹងគាំទ្រដល់គោលនយោបាយការបរទេស រួមទាំងសន្តិសុខជាតិរបស់សហរដ្ឋអាមេរិក តាមរយៈ ការជួយពង្រឹងសមត្ថភាពការពារជាតិ និងសន្តិសុខនៃសម្ព័ន្ធមិត្តដ៏ធំដូចជាជប៉ុន ដើម្បីចូលរួមចំណែក ថែរក្សាស្ថេរភាព និងកំណើនសេដ្ឋកិច្ចក្នុងតំបន់អាស៊ី-ប៉ាស៊ីហ្វិក»។
គួរបញ្ជាក់ផងដែរថា បើតាមទីភ្នាក់ងារខាងលើដដែល កិច្ចព្រមព្រៀងបឋមលើការលក់មីស៊ីលឱ្យជប៉ុន គឺផ្តោតជា សំខាន់លើការលក់មីស៊ីលប្រភេទ Standard Missile-3 និងប្រព័ន្ធមីស៊ីល MK 29 Canisters ៕សសអក