រដ្ឋបាលខេត្តកែប បើកកិច្ចប្រជុំ រៀបចំយន្តការសម្របសម្រួល ការប្រឡងសញ្ញាបត្រ មធ្យមសិក្សាទុតិយភូមិ
ខេត្តកែប៖ការរៀបចំសន្តិសុខ សណ្តាប់ធ្នាប់ របៀបរៀបរយ និងសុវត្តិភាព តាមមណ្ឌលប្រលងនៅខេត្តកែប ត្រូវតែធានាឲ្យបានល្អប្រសើរសម្រាប់ថ្ងៃប្រឡងសញ្ញាបត្រមធ្យមសិក្សាទុតិយភូមិ នៅគ្រប់មណ្ឌលប្រឡងទូទាំងខេត្តកែប។
នេះជាការលើកឡើងរបស់ លោក កែន សត្ថា អភិបាល នៃគណ:អភិបាលខេត្តកែប ក្នុងឱកាសដែល លោក និងលោក ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេស ប្រចាំខេត្តកែប បានអញ្ចើញដឹកនាំកិច្ចប្រជុំរៀបចំយន្តការ សម្របសម្រួលការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៩ ជាមួយភាគីអ្នកពាក់ព័ន្ធ នៅសាលាខេត្តកែប នាព្រឹកថ្ងៃទី១៧ សីហា ឆ្នាំ២០១៩ នេះ។
ជាមួយគ្នានេះ ក្នុងកិច្ចប្រជុំ លោកប្រធានអង្គប្រជុំ បានដាក់ចេញនូវផែនការសំខាន់ៗ និងបានចាត់តាំងកម្លាំងសម្រាប់ទទួលខុសត្រូវ គ្រប់ផ្នែកទាំងការការពារសន្តិសុខសណ្តាប់ធ្នាប់ ការត្រៀមបង្ការសង្រ្គោះបន្ទាន់ ការរក្សាសុវត្ថិភាពវិញ្ញាសា គណៈមេប្រយោគ បេក្ខជន និងការបង្ការសកម្មភាពមិនប្រក្រតីណាមួយ ដើម្បីឲ្យដំណើរការប្រឡងសញ្ញាប័ត្រមធ្យមសិក្សាទុតិយភូមិឆ្នាំនេះ ទទួលបានជោគជ័យតាមការណែនាំរបស់ថ្នាក់ជាតិ៕
