រដ្ឋបាលខេត្តកំពត បើកកិច្ចប្រជុំ ត្រៀមរៀបចំការប្រឡង សញ្ញាបត្រមធ្យមសិក្សាទុតិយភូមិ សម័យប្រលងថ្ងៃទី១៩ ខែ សីហា ឆ្នាំ ២០១៩
ខេត្តកំពត៖នាព្រឹកថ្ងៃសុក្រ ១រោច ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៦ ខែសីហា ឆ្នាំ២០១៩ ឯកឧត្តម ជាវ តាយ អភិបាលនៃគណ:អភិបាលខេត្តកំពត បានអញ្ជើញជាអធិបតីក្នុងកិច្ចប្រជុំត្រៀមរៀបចំការប្រឡងសញ្ញាបត្រមធ្យមសិក្សាទុតិយភូមិ សម័យប្រលងថ្ងៃទី១៩ ខែសីហា ឆ្នាំ២០១៩ ដោយមានការអញ្ញើញចូលរួមពី លោកអភិបាលរងខេត្ត តំណាងមន្ទីរអប់រំយុវជន និងកីឡា តំណាងស្នងការដ្ឋាននគរបាល តំណាងបញ្ជាការដ្ឋានកងរាជអាវុធហត្ថខេត្ត អភិបាលក្រុង ស្រុក និងមន្ត្រីពាក់ព័ន្ធសរុបចំនួន១៥រូប។
ក្នុងកិច្ចប្រជុំនេះ ឯកឧត្តអភិបាលខេត្ត បានណែនាំនិងបានផ្តល់អនុសាន៍ដឹកនាំដូចខាងក្រោម៖
១.ផ្តល់ជូនលោកអភិបាលក្រុងកំពត និងលោកអភិបាលស្រុកទឹកឈូ ទទួលខុសត្រូវក្នុងការផ្ញើកង់ និងម៉ូតូរបស់បេក្ខជនប្រលងទាំង១០មណ្ឌល ដោយមិនយកប្រាក់កំរៃ រដ្ឋបាលខេត្តជាអ្នកទទួលបន្ទុកចំណាយ ។
២.នៅថ្ងៃទី១៩ ខែសីហា ឆ្នាំ២០១៩ ឯកឧត្តមអភិបាលខេត្ត រួមជាមួយនឹងថ្នាក់ដឹកនាំខេត្តនឹងអញ្ជើញចូលរួមក្នុងពិធីបើកស្រោមសំបុត្រវិញ្ញាប្រឡងតាមមណ្ឌលប្រឡនីមួយៗ។
២.ស្នើដល់មន្ទីរអប់រំយុវជន និងកីឡារៀបចំសញ្ញា ឬប្លង់ចំពោះមណ្ឌលដែលប្តូរទីតាំងថ្មី ពីអនុវិទ្យាល័យ ហ៊ុន សែន ក្រាំងអំពិល មកសាលារៀន គួង យ៉ុក និងផ្សព្វផ្សាយឲ្យបានទូលំទូលាយជូនដល់បេក្ខជន និងមហាជន។
៣.គណៈបញ្ជាការរដ្ឋបាលឯកភាពខេត្ត បានរៀបចំផែនការពារការប្រឡងសញ្ញាបត្រទុតិយភូមិទាំង១០មណ្ឌលដោយប្រើប្រាស់កម្លាំងនគរបាល និងកម្លាំងកងរាជអាវុធហត្ថតាមគោលដៅនីមួយៗរួចជាស្រេច ។
ចំពោះ ភោជនីយដ្ឋាន អាហារដ្ឋាន សណ្ឋាគារ ផ្ទះសំណាក់ ត្រូវធ្វើអន្តរាគមន៍ជាក់ស្តែងចំពោះកន្លែងណាដែលបានតម្លើងថ្លៃ នៅអំឡុងពេលប្រឡង ត្រូវរៀបចំលេខទូរស័ព្ទទំនាក់ទំនង (Hotline) បិទនៅតាមភោជនីយដ្ឋាន អាហារដ្ឋាន សណ្ឋាគារ ផ្ទះសំណាក់ ដើម្បីងាយស្រួលក្នុងការសម្របសម្រួលដោះស្រាយបញ្ហាដែលកើតឡើង៕
