នាយករដ្ឋមន្ត្រីប៉ាគីស្ថាន ចុះទៅតំបន់កាស្មៀរដែលគ្រប់គ្រង ដោយប៉ាគីស្ថាន ចំពេលមានភាពតានតឹងជាមួយឥណ្ឌា
អន្តរជាតិ៖កាលពីថ្ងៃពុធនាយករដ្ឋមន្រ្តីប៉ាគីស្ថានលោក Imran Khan បានធ្វើទស្សនកិច្ចនៅតំបន់កាស្មៀរដែលគ្រប់គ្រងដោយប៉ាគីស្ថាន ចំពេលមានភាពតានតឹងកំពុងបន្តជាមួយឥណ្ឌា។ នេះបើយោងតាមការចុះផ្សាយរបស់ទីភ្នាក់ងារព័ត៌មានចិនChina Daily នៅថ្ងៃទី១៥ ខែសីហា ឆ្នាំ២០១៩នេះ។
ក្នុងដំណើរទស្សនកិច្ចរបស់លោកខាន់បាននិយាយនៅក្នុងសុន្ទរកថា មួយទៅកាន់សភានីតិកម្មនៃកាស្មៀរដែលគ្រប់គ្រងដោយប៉ាគីស្ថានថា ប្រទេសរបស់លោកនឹងផ្លាស់ប្តូរអង្គការសហប្រជាជាតិ និងតុលាការយុត្តិធម៌អន្តរជាតិដើម្បីទទួលបានសិទ្ធិសម្រាប់ប្រជាជនកាស្មៀរដែលគ្រប់គ្រងដោយឥណ្ឌា។
គួរបញ្ជាក់ផងដែរថា ប្រទេសប៉ាគីស្ថានបានប្រារព្ធទិវាឯករាជ្យរបស់ខ្លួននៅថ្ងៃពុធ ហើយ មុននេះរដ្ឋាភិបាលក៏បានចាត់ទុកថ្ងៃនោះជាទិវាសាមគ្គីភាពកាស្មៀ ដើម្បីបង្ហាញការគាំទ្រដល់ប្រជាជនកាស្មៀរ។
ទន្ទឹមនឹងនេះនាយករដ្ឋមន្រ្តីប៉ាគីស្ថានបាននិយាយថា សង្គ្រាមមិនមែនជាដំណោះស្រាយចំពោះបញ្ហាកាស្មៀរទេ ប៉ុន្តែលោកបានព្រមានថាកងទ័ពប៉ាគីស្ថានត្រៀមខ្លួន និងត្រៀមលក្ខណៈយ៉ាងល្អដើម្បីបំផ្លាញ់ការឈ្លានពានណាមួយដែលអាចកើតមាន៕
