សហរដ្ឋអាមេរិកបានសងសឹក ដោយបាញ់ទំលាក់ ដ្រូនអ៊ីរ៉ង់មួយគ្រឿងហើយ
វ៉ាស៊ីនតោន៖ប្រធានាធិបតីអាមេរិកលោក ដូណាល់ ត្រាំ បាននិយាយថា កងនាវាអាមេរិក បានបាញ់ទម្លាក់យន្ដហោះដ្រូនអ៊ីរ៉ង់មួយគ្រឿង នៅឯច្រកសមុទ្រ ហ័រមូស (Hormuz)ហើយ ។នេះបើយោងតាមការចុះផ្សាយរបស់ទីភ្នាក់ងារព័ត៌មាន BBC នៅថ្ងៃទី១៩ ខែកក្កដា ឆ្នាំ២០១៩ នេះ។
យោងតាមសម្តីលោក ត្រាំ បានឲ្យដឹងថា នាវាចម្បាំងអាមេរិក USS ប៊កស៊ឺ បានបាញ់ទម្លាក់យន្ដហោះដ្រូនអ៊ីរ៉ង់មួយគ្រឿង កាលពីថ្ងៃព្រហស្បតិ៍ បន្ទាប់ពីយន្ដហោះនេះ ហោះមកក្បែរនៅចំងាយ ៩១៤ម៉ែត្រ ពីនាវាចម្បាំងអាមេរិកនេះ។
ទោះបីជាយ៉ាងណាក៏ដោយ យើងក៏មិនទាន់ឃើញមានប្រតិកម្មណាមួយពីភាគីខាងអ៊ីរ៉ង់នៅឡើយទេ។
ការអះអាងរបស់លោក ត្រាំ ក៏ត្រូវបានគេវិភាគថា នឹងធ្វើឱ្យកម្តៅរវាងអាមេរិក និងអ៊ីរ៉ង់កើនកាន់តែខ្លាំង ដែលបង្កឲ្យមានការព្រួយបារម្ភអំពីការផ្ទុះសង្រ្គាមរវាងប្រទេសទាំងពីរនេះ៕
