សហរដ្ឋអាមេរិក សម្រេចចិត្តអនុម័តលក់អាវុធក្នុងតំលៃ២,២ ពាន់លានដុល្លារ ទៅឱ្យតៃវ៉ាន់ ក្នុងគោលបំណងជំរុញសន្តិភាព នៅក្នុងតំបន់
អាមេរិក៖អ្នកនាំពាក្យក្រសួងការបរទេសលោក Morgan Ortagus បានថ្លែងកាលពីថ្ងៃចន្ទថា សហរដ្ឋអាមេរិកបានសម្រេចចិត្តអនុម័តលើការលក់អាវុធចំនួន២,២ ពាន់លានដុល្លារដ៏ចម្រូងចម្រាសទៅឱ្យកោះតៃវ៉ាន់នៅដើមសប្តាហ៍នេះជាផ្នែកមួយ ដើម្បីជំរុញសន្តិភាពក្នុងតំបន់។នេះបើយោងតាមការចុះផ្សាយរបស់ទីភ្នាក់ងារព័ត៌មានសិង្ហបុរី Channel News Asia នៅថ្ងៃទី១០ ខែកក្កដា ឆ្នាំ២០១៩ នេះ។
លោកអ័រហ្គីសបាននិយាយថា "ចំណាប់អារម្មណ៍របស់យើងចំពោះតៃវ៉ាន់ជាពិសេសពាក់ព័ន្ធនឹងការលក់យោធាទាំងនេះ គឺដើម្បីលើកកម្ពស់សន្តិភាពនិងស្ថិរភាពនៅក្នុងតំបន់។ ដូច្នេះហើយមិនមានការផ្លាស់ប្តូរទេនៅក្នុងគោលនយោបាយចិនដ៏វែងឆ្ងាយរបស់យើង។
ភ្នាក់ងារសហប្រធានសន្តិសុខការពារជាតិអាមេរិកកាលពីថ្ងៃចន្ទបានប្រកាសថា ក្រសួងការបរទេសបានចុះហត្ថលេខា លើសំណើរបស់កោះតៃវ៉ាន់ ដើម្បីទិញរថក្រោះប្រមាណ១០០គ្រឿងនិងសម្ភារៈពាក់ព័ន្ធដែលមានតម្លៃជាង២ពាន់លានដុល្លារ។គាត់បាននិយាយថា សហរដ្ឋអាមេរិកក៏បានយល់ព្រមលក់មីស៊ីលឲ្យតៃវ៉ាន់ចំនួន២៥០ ដើមដែលមានតម្លៃប្រហែល២២៤លានដុល្លារ។
ទោះបីជាយ៉ាងណាអ្នកនាំពាក្យក្រសួងការបរទេសចិនលោក Geng Shuang បាននិយាយកាលពីថ្ងៃអង្គារថា ប្រទេសចិនដែលចាត់ទុកតៃវ៉ាន់ជាខេត្តរបស់ខ្លួន បានតវ៉ាចំពោះសកម្មភាពនេះហើយបានទាមទារឱ្យអាមេរិកលុបចោលកិច្ចព្រមព្រៀងនេះ។
គួរបញ្ជាក់ផងដែរថា ទំនាក់ទំនងជាផ្លូវការរវាងតៃវ៉ាន់ និងអាជ្ញាធរកណ្តាលរបស់ចិនត្រូវបានកាត់ផ្តាច់ក្នុងឆ្នាំ១៩៤៩៕